Sulmi terrorist/ Hakmerret Turqia, arrestime edhe në Bullgari

Pas sulmit terrorist me 6 viktima dhe 83 të plagosur, ka ardhur dhe reagimi i Turqisë ndaj kurdëve. Për shkak të bombardimeve ndaj objektivave kurde në Siri, numri i të vdekurve raportohet të paktën 32. Kjo konsiderohet hakmarrja më e ashpër e Ankarasë pas sulmit që goditi Istiklalin, arterien qeëndrore dhe shumë të ngarkuar të Stambollit.

Kurdët ndërkohë po bëjnë thirrje për një armëpushim, teksa sipas një dëshmitari, Turqit bombarduan 5 lokacione në Siri.

Ndërkohë në Bullgari ka patur arrestime që lidhen me sulmin terrorist në Turqi. Personat e arrestuar akuzohen për krijimin e bandave të armatosura dhe se kanë dhënë ndihmë logjistike për atentatin. Ndërkohë, të premten, një gjykatë turke ka paditur 17 të dyshuar me akuzat për sulm ndaj unitetit të shtetit, vrasje dhe tentativë vrasje.

Agjencia e lajmeve Anadolu tha se gjykata liroi tre të dyshuar të tjerë nga paraburgimi në pritje të gjykimit dhe urdhëroi dëbimin e 29 personave që u arrestuan nga policia.

Autoritetet turke fajësuan Partinë e jashtëligjshme të Punëtorëve të Kurdistanit, ose PKK, si dhe grupet kurde siriane të lidhura me të.