Takimet e Kurtit me TRESHEN, që dhanë efekt, qeveria s’po flet më për hapjen e urës

Me synimin për të qartësuar situatën, pas paralajmërimeve të Qeverisë për hapjen e urës së Ibrit në Mitrovicë pa koordinim me KFOR-in, brenda këtij muaji Kosova u shndërrua në destinacion për vizitë të figurave të larta të Shteteve të Bashkuara të Amerikës dhe NATO-s.

Ura mbi Ibër ishte temë edhe në takimet që kryeministri Albin Kurti pati me Shefin e Agjencisë Qendrore Amerikane të Inteligjencës, William Burns, ndihmës Sekretarin e Përgjithshëm të NATO-s për Politikë të Jashtme dhe Siguri, Boris Ruge dhe Komandantin e Komandës së Forcave të Përbashkëta Aleate në Napoli, Admirali amerikan Stuart B.Munsch

Në sytë e ish-zëdhënësit të NATO-s në kohën e luftës së Kosovës, Jamie Shea, tani profesor i sigurisë në Bruksel, këto vizita tregojnë “angazhimin” e Shteteve të Bashkuara të Amerikës dhe NATO-s që mos të ndodh një tjetër sulm si ai Banjskës.

“Sigurisht hapja e mundshme e urës në Mitrovicë ka shkaktuar shqetësim për telashe të mundshme apo edhe shpërthim të dhunës në Veri. Megjithëse ambasadorët perëndimorë në Prishtinë kanë dhënë mesazhet e tyre, sipas mendimit tim ishte e dobishme që këto mesazhet të jepen edhe nga zyrtarë të tjerë të lartë që erdhën në Prishtinë dhe kjo pati ndikim” – theksoi ish gjenerali.

Ndërkaq Qeveria e Kosovës e vlerësoi vizitën e kreut te CIA-s si “moment të rëndësishëm historik” në marrëdhëniet ndërmjet Kosovës dhe Shteteve të Bashkuara.