Trump deklaroi një kusht që SHBA të mbetet në NATO

Presidenti i zgjedhur i Shteteve të Bashkuara, Donald Trump, bëri thirrje të dielën për një armëpushim të menjëhershëm në Ukrainë. Ai përsëriti gjithashtu paralajmërimin se është i hapur për të nxjerrë Shtetet e Bashkuara nga NATO.

Zoti Trump i bëri komentet për Ukrainën një ditë pas një takimi në Paris me Presidentin francez Emmanuel Macron dhe atë ukrainas, Volodymyr Zelenskyy, duke thënë se Kievi “do të donte të arrinte një marrëveshje” për t’i dhënë fund luftës vazhdon prej mbi 1000 ditësh.

Në një postim në platformën e tij “Truth Social”, Trump shkruan se Moska dhe Kievi kanë humbur qindra mijëra ushtarë në një luftë që “nuk duhet të kishte filluar kurrë”. “Duhet të ketë një armëpushim të menjëhershëm dhe të fillojnë negociatat. Shumë jetë po humbin pa nevojë, shumë familje po shkatërrohen”, tha ai, ndërsa i bëri thirrje presidentit rus Vladimir Putin të veprojë për t’u dhënë fund luftimeve.

Komentet e zotit Trump erdhën pas takimit të shtunën me presidentin Zelenskyy dhe homologun e tij francez, Emmanuel Macron, të cilin zoti Zelenskyy më vonë e përshkroi si “konstruktiv”.

Duke folur me gazetarët më vonë po të shtunën, zoti Zelenskyy këmbënguli se çdo marrëveshje paqeje “duhet të jetë e drejtë” për ukrainasit, “në mënyrë që Rusia dhe Putini apo çdo agresor tjetër të mos kenë mundësinë të kthehen”.

Në një përditësim të veçantë në mediat sociale të dielën, Zelenskyy pohoi se Kievi ka humbur 43,000 ushtarë që nga fillimi i agresionit të Moskës më 24 shkurt 2022, ndërsa 370,000 të tjerë janë plagosur. Si Rusia ashtu edhe Ukraina kanë hezituar të publikojnë shifrat zyrtare të viktimave, por zyrtarët perëndimorë kanë thënë se muajt e fundit të luftës së ashpër në Ukrainën lindore kanë sjellë humbje rekord për të dyja palët, me dhjetëra mijëra të vrarë dhe të plagosur çdo muaj.

Ndërkohë në një intervistë për televizionin NBC që u transmetua të dielën, zoti Trump ripërsëriti paralajmërimin e tij për aleatët e NATO-s se nuk duhej marrë si e mirëqenë prania e përhershme e Shteteteve të Bashkuara në aleancën ushtarake perëndimore gjatë mandatit të tij të dytë.

I pyetur në intervistën e regjistruar të premten nëse ai do të konsideronte mundësinë e tërheqjes nga NATO, zoti Trump tha se kjo ishte një pyetje e hapur.

“Nëse ata paguajnë faturat dhe nëse mendoj se po na trajtojnë në mënyrë të drejtë, përgjigja është po, absolutisht unë do të qëndroj me NATO-n,” tha ai për emisionin “Meet the Press”.

Kur u pyet nëse do ta konsideronte tërheqjen nga NATO nëse kjo nuk ndodh, Presidenti i zgjedhur Trump u përgjigj: “Absolutisht. Po, absolutisht.”