Trump gati të lejojë Ukrainën të përdorë armë me rreze të gjatë kundër Rusisë

Sipas Wall Street Journal, Presidenti i Shteteve të Bashkuara, Donald Trump, i ka komunikuar presidentit ukrainas, Volodymyr Zelensky, se është i gatshëm të heqë kufizimet mbi përdorimin e armëve amerikane me rreze të gjatë për të goditur objektiva brenda territorit rus.

Takimi mes dy liderëve u zhvillua të martën, por Trump nuk dha një zotim përfundimtar mbi zbatimin e kësaj politike, duke lënë të hapur mundësinë për diskutime të mëtejshme.

Ky zhvillim, nëse finalizohet, do të përbënte një kthesë të rëndësishme në mbështetjen ushtarake të SHBA për Kievin, duke i dhënë Ukrainës një avantazh të ri në fushën e betejës, por gjithashtu duke rritur rreziqet për përshkallëzim të konfliktit me Moskën.

Presidenti ukrainas Volodymyr Zelensky i kërkoi presidentit amerikan Donald Trump gjatë takimit të tyre të martën që t’i siguronte Ukrainës raketa Tomahawk, të cilat mund t’i jepnin vendit aftësinë për të goditur deri në Moskë në Rusi.

Zelensky i tha “The Axios Show” të mërkurën se i kishte kërkuar Trumpit një sistem shtesë armësh, që mund ta detyronte presidentin rus Vladimir Putin të hynte në bisedime paqeje – ndoshta pa pasur nevojë Ukraina ta përdorte atë.

Zelensky nuk e përmendi atë sistem armësh gjatë intervistës së tij me Barak Ravid të Axios, por tha se nëse Rusia do të dinte që Ukraina e kishte atë, presioni për të folur do të rritej shumë.

Një zyrtar ukrainas dhe një burim tjetër i njohur me takimin Trump-Zelensky konfirmuan se ishte Tomahawk – një raketë me rreze të gjatë veprimi dhe me precizion të lartë.

Ukraina i ka ngritur disa herë çështjen e Tomahawk-ëve me SHBA-të gjatë vitit të kaluar, duke përfshirë edhe në një listë të pajisjeve që Kievi kërkoi disa muaj më parë.

Ishte i vetmi sistem armësh në listë që Trump nuk pranoi t’ua shiste vendeve të NATO-s në emër të Ukrainës, sipas një burimi me njohuri për atë proces.

Telegraph raportoi më herët të premten se Zelensky kishte kërkuar Tomahawk në takim.

I pyetur se çfarë gjëje të vetme mund të bënte Trump për të ndihmuar Ukrainën të fitonte luftën, Zelensky i tha Axios: “Mendoj se Presidenti Trump e di. I thashë dje se çfarë na duhet, një gjë”.

“Meqë ra fjala, na duhet, por kjo nuk do të thotë se do ta përdorim. Sepse nëse do ta kemi, mendoj se është presion shtesë mbi Putinin që të ulet dhe të flasë”, vazhdoi ai.

Zelensky aludoi në idenë se mund të vendosen kushte për përdorimin e sistemit nga Ukraina në varësi të sjelljes së Rusisë.

Më në detaje, Zelensky tha gjatë intervistës në Axios se Trump i kishte thënë se Ukraina duhet të përgjigjet me kokë për kokë: “Nëse ata sulmojnë energjinë tonë, Presidenti Trump mbështet që ne mund të përgjigjemi për energjinë”. E njëjta gjë vlen edhe për depot e armëve dhe vendet e prodhimit.

Zelensky vuri në dukje se Ukraina tashmë mund të arrijë thellë brenda Rusisë me dronë, por shumë objektiva ushtarake kanë mbrojtje ajrore të sofistikuara që janë të vështira për t’u thyer me dronë.

Tomahawk, i prodhuar nga RTX, ka një rreze veprimi shumë më të gjatë se raketat që NATO ka vënë në dispozicion deri më tani, duke fluturuar deri në 1 mijë milje kundrejt rreth 190 miljeve për ATACMS të prodhuara në SHBA.

Është gjithashtu shumë më i shpejtë se dronët e Ukrainës dhe ka një fuqi më të madhe.

Ukraina është përpjekur të anashkalojë mungesën e gatishmërisë së partnerëve të saj për të ofruar armë me rreze të gjatë veprimi duke zhvilluar sistemet e veta, të tilla si Palianytsia dhe Flamingo, megjithëse atyre u mungon historiku dekadash i Tomahawk.

Zelensky tha se Trump i tha atij “ne do të punojmë për këtë” kur ai kërkoi sistemin e ri të armëve.

Pala amerikane mund të jetë e shqetësuar si nga perspektiva e përshkallëzimit nëse Uashingtoni ofron një raketë që e sjell Moskën në kontakt të plotë, ashtu edhe për rezervat e saj mjaft të kufizuara të Tomahawk-ëve, të cilët duhen shumë muaj për t’u rimbushur.

Zelensky i tha Axios se nëse zyrtarët rusë refuzojnë të përfundojnë luftën, ata duhet të gjejnë strehën më të afërt kundër bombave. “Ata do të kenë nevojë për të, gjithsesi”.