Trump: Putin dhe Xi janë lider shumë të fortë e të zgjuar, me ata nuk duhet të luash

Presidenti i SHBA-së, Donald Trump, i ka vlerësuar homologët e tij rusë dhe kinezë si “liderë shumë të fortë”, duke i quajtur Vladimir Putin dhe Xi Jinping “të fortë”, “të zgjuar” dhe “me të cilët nuk duhet të luhet”.
I pyetur nga intervistuesi se me kë është më e vështirë të merresh vesh, me Xi apo me Putin, Trump u përgjigj: “Të dy”.
“Të dy të fortë. Të dy të zgjuar. Të dy – shikoni, të dy janë udhëheqës shumë të fortë. Këta janë njerëz me të cilët nuk duhet të luash. Këta janë njerëz që duhet t’i marrësh shumë seriozisht”, tha ai, duke shtuar se asnjërit prej tyre nuk i pëlqen të bëjë muhabet të kot.
“Ata nuk janë – nuk po hyjnë duke thënë: ‘Oh, a nuk është një ditë e bukur? Shikoni sa e bukur. Dielli po shkëlqen, është kaq bukur’. Këta janë njerëz seriozë. Këta janë njerëz që janë udhëheqës të fortë dhe të zgjuar”, tha Trump.
Trump më vonë tha se si Rusia ashtu edhe Kina kanë rezerva të mëdha armësh bërthamore dhe se ai ka diskutuar denuklearizimin me të dyja vendet.
Lidhur me lidhjet SHBA-Kinë, Trump këmbënguli se pavarësisht sfidave, ai dhe udhëheqësi kinez “shkojnë shumë mirë”, duke shtuar se pas muajsh tensionesh, ata arritën një marrëveshje tregtare me të cilën ai është kryesisht i kënaqur. “Nuk kemi asnjë kërcënim për metale të rralla… Kemi sasi të jashtëzakonshme dollarësh që po vërshojnë, sepse kemi tarifa shumë të larta, pothuajse 50%.”
Ai përsëriti gjithashtu se ka “një marrëdhënie shumë të mirë” me Putinin dhe fajësoi paraardhësin e tij, Joe Biden, për konfliktin “budalla” në Ukrainë.
“Kjo ishte një luftë që nuk do të kishte ndodhur kurrë nëse unë do të isha president”, tha ai, duke shtuar se edhe Putini e pranoi këtë.
Ai vazhdoi të përsëriste pretendimin e tij se ka zgjidhur tetë luftëra që kur u kthye në Shtëpinë e Bardhë këtë vit – kryesisht duke përdorur tregtinë si levë – dhe këmbënguli se mund të përdorë të njëjtat mjete për të siguruar një armëpushim për Ukrainën “brenda disa muajsh”.
“Do ta përfundojmë… [Putini] dëshiron të vijë dhe dëshiron të bëjë tregti me ne, dhe dëshiron të fitojë shumë para për Rusinë, dhe mendoj se kjo është shumë mirë.”