U dekorua “Shqiponja e Artë”, trajneri Sylvinho falenderon lojtarët: Pa ju s’do ishte e mundur

Trajneri i Kombëtares Shqiptare, Sylvinho ka qenë i ftuar së bashku me stafin teknik kuqezi në Samitin e Diasporës që u zhvillua në Tiranë. Gjatë këtij eventi, numri një i stolit të Shqipërisë është nderuar edhe me çmimi “Shqiponja e Artë” për kontributin e tij në fushatën kualifikuese të Kombëtares kuqezi, që arriti të siguronte një biletë historike për në finalet e Europianit “Gjermani 2024”.

Ishte Kryeministri i Shqipërisë, Edi Rama i cili e ftoi teknikun në skenë së bashku me ndihmësit e tij Doriva, Hamdi Salihi si edhe drejtorin e Ekipeve Kombëtare në FSHF, Dritan Babamusta, duke i dorëzuar çmimin mes batutave. Me çmimin në duart e tij, braziliani përshëndeti në shqip të gjithë të pranishmit:

“Mirëmbrëma. Shumë faleminderit. Faleminderit të gjithëve”, tha Sylvinho, duke shtuar. Dua të falënderoj të gjithë lojtarët e Kombëtares shqiptare, janë të gjithë të fortë, por sigurisht pa harruar edhe stafin teknik dhe Federatën Shqiptare të Futbollit. Ne jemi këtu disa përfaqësues, por ne kemi mbi 15 persona në stafin e skuadrës”

Në fund, udhëheqësi i skuadrës kombëtare, përshëndeti të gjithë lojtarët që bën të mundur këtë ëndërr dhe sipas tij, pa ata do të ishte e pamundur.

Një qytetar i botës i lindur në San Paolo, që ka bërë një rrugëtim të gjatë në futboll duke kaluar nga Londra, Mançester, Milano dhe sot një qytetar shqiptar. Ju faleminderit edhe një herë të gjithëve”, – theksoi Sylvinho.

Samiti i 3-të i Diasporës u zhvillua në Pallatin e Kongreseve dhe bëri bashkë përfaqësues dhe figura të njohura të komunitetit arbëresh në Itali, studiues e historianë në Ditën e Arbëreshëve, ndërsa Ministri Taulant Balla ndau gjithashtu lajmin se tashmë Sylvinho ka marrë dhe pasaportën shqiptare.