‘U dhunua vëllai i deputetit’, policia përgënjeshtron lajmin

Policia ka përgenjeshtruar lajmin e qarkulluar në media se vëllai i deputetit demokrat Bledion Nallbati, Alti është dhunuar nga dy persona. Policia njofton se pas qarkullimit në media të lajmit, kanë marrë në pyetje të tre personat e përfshirë në ngjarje dhe ata kanë mohuar të kenë probleme me njëri-tjetrin.

Njoftim i Policisë:

DVP Korçë/Sqarim Në lidhje me një lajm të publikuar në rrjete sociale se në Devoll, dy vëllezër shtetasit O. Z. dhe B. Z., janë konfliktuar dhe e kanë dhunuar vëllain e deputetit të PD, shtetasin A. N., ju sqarojmë se lajmi është i pavërtetë. Nga ana e Specialistëve për Hetimin e Krimit u kërkua të paraqiteshin në Komisariatin e Policisë Devoll dy vëllezërit O. Z. dhe B. Z., si dhe shtetasi A. N., të cilët janë pyetur dhe intervistuar në lidhje me ngjarjen e pretenduar. Tre shtetasit kanë deklaruar se nuk janë konfliktuar dhe se nuk kanë probleme me njëri-tjetrin. Pas intervistimit të kryer, të tre shtetasit janë lënë të lirë. Drejtoria Vendore e Policisë Korçë kërkon mirëkuptimin e mediave që para se të publikojnë lajme, të kërkojnë informacion zyrtar pranë DVP Korçë.