U mor në pyetje nga SPAK, Gentjan Sula i “Kodrës së Diellit” kërkon t’i kthehet celulari

Gentjan Sula, i njohur ndryshe si biznesmeni i “Kodrës së Diellit” për shkak të ndërtimeve që ka bërë në këtë zonë, ka bërë kërkesë në Gjykatën e Posaçme për kthimin e celularit të tij.

Burime bëjnë me dije se celulari i është sekuestruar Gentjan Sulës nga agjentët e BKH-së në kuadër të një hetimi të nisur nga SPAK. Biznesmeni e konsideron si veprim të paligjshme sekuestrimin e telefonit të tij.

Ndërkohë, më 6 Janar, Gentjan Sula dëshmoi për më shumë se tre orë në Prokurorinë e Posaçme në cilësinë e personit që ka dijeni mbi rrethana të një procedimi penal të nisur nga SPAK-u.

Pas dëshmisë, ai u largua në heshtje, duke mos dhënë asnjë prononcim për gazetarët.

Emri i biznesmenit Gentian Sula figuron në dosjen e SPAK dhe lidhjet me hetimet që po zhvillohen për Ilir Metën, Monika Kryemadhin dhe nënë e saj, Fatime Kryemadhi. Sipas dosjes së SPAK-ut, Gentjan Sula i dha para “cash” nënës së Monika Kryemadhit për të paguar kreditë.

Gjithashtu, mediat raportojnë se ai është marrë në pyetje dhe në lidhje me hetimet e SPAK ndaj kreut të Bashkisë së Tiranës, Erion Veliaj, më konkretisht për banesën e këtij të fundit.

Erion Veliaj ka deklaruar se prej vitesh jeton në rezidencën “Kodra e Diellit”, që është pronë e Gentian Sulës.