U pretendua se Rusia përgjonte lëvizjet e Von der Leyen/ Kremlini reagon ashpër, jep versionin e tij

Një sulm i dyshuar rus me ndërhyrje që synonte Presidenten e Komisionit Evropian, Ursula von der Leyen, çaktivizoi shërbimet e navigimit GPS në një aeroport bullgar dhe e detyroi aeroplanin e presidentes së Komisionit Evropian të ulej duke përdorur harta letre.

Financial Times raporton se një aeroplan që transportonte von der Leyen në Plovdiv iu hoq sistemi elektronik i navigimit gjatë afrimit në aeroportin e qytetit të dielën pasdite, në atë që tre zyrtarë të informuar mbi incidentin e karakterizuan si një operacion ndërhyrjeje ruse.

“I gjithë sistemi GPS i aeroportit u prish “, tha një nga zyrtarët. Pasi rrethoi aeroportin për një orë, piloti i aeroplanit vendosi të ulej manualisht duke përdorur harta analoge, shtuan ata. “Kjo ishte një ndërhyrje e pamohueshme.”

Kremlini dhe Komisioni Evropian janë kontaktuar për koment. Autoriteti Bullgar i Kontrollit të Trafikut Ajror e konfirmoi incidentin në një deklaratë për Financial Times . “Që nga shkurti i vitit 2022, ka pasur një rritje të konsiderueshme të rasteve të bllokimit (GPS) dhe, së fundmi, të mashtrimit (falsifikimit të burimeve të informacionit dhe të të dhënave)”, thuhet në raport.

“Këto ndërhyrje në marrjen e saktë të sinjaleve GPS shkaktojnë disa sfida operacionale për sistemet ajrore dhe tokësore.”

Moska mohon përfshirjen – Zëdhënësi i Kremlinit, Dmitry Peskov, mohoi përfshirjen ruse. “Informacioni juaj është i pasaktë”, tha Peskov për Financial Times , gazetën që zbuloi e para mosfunksionimin e sistemit të navigimit të aeroplanit gjatë uljes në Bullgari.

Çfarë ndodhi? – I ashtuquajturi bllokim dhe falsifikim i GPS-it, i cili shtrembëron ose pengon aksesin në sistemet e navigimit satelitor, kujton Financial Times, është përdorur tradicionalisht nga shërbimet ushtarake dhe të inteligjencës për të mbrojtur vende të ndjeshme, por është përdorur gjithnjë e më shumë nga vende të tilla si Rusia si një mjet për të prishur jetën civile.

Komisioni po heton – Vitet e fundit, incidentet e bllokimit të sinjalit GPS janë rritur ndjeshëm në Detin Baltik dhe në shtetet e Evropës Lindore pranë Rusisë, duke prekur avionët, anijet dhe civilët që përdorin shërbimin për navigim të përditshëm. Von der Leyen po fluturonte nga Varshava drejt qytetit qendror bullgar për t’u takuar me kryeministrin Rosen Zhelyazkov dhe për të vizituar një fabrikë municionesh. Pas vizitës, von der Leyen u largua nga Plovdivi me të njëjtin aeroplan pa incidente.

Aeroplani me të cilin udhëtonte von der Leyen ishte “një fluturim çarter”. A ishte shënjestra e sulmit ndaj aeroplanit të presidentit? “Kjo pyetje duhet t’u bëhet rusëve, nëse me të vërtetë ata ishin ata që kryen veprimin, siç dyshojnë autoritetet bullgare, dhe autoriteteve bullgare të cilat po hetojnë çështjen. Ajo që mund të themi është se autoritetet bullgare dyshojnë se kjo ndërhyrje e hapur është kryer nga Rusia, dhe ky është informacioni që kemi marrë prej tyre”, deklaroi zëdhënësja e Komisionit Evropian, Arianna Podestà, në konferencën e saj të përditshme për shtyp.

“Presidentja aktualisht po viziton shtatë shtete anëtare në vijën e frontit. Një nga ndalesat e saj ishte Bullgaria, ku ajo duhej të vizitonte vijën e frontit, dhe aty ndodhi kjo ndërhyrje. Megjithatë, avioni u ul në mënyrë të sigurt në destinacionin e tij fillestar. Pra, nuk pati ndryshim itinerari për shkak të kësaj”, sqaroi zëdhënësi.