U takua me të birin para pak ditësh: Ndahet nga jeta babai i Hashim Thaçit

Babai i ish-presidentit të Kosovës, Hashim Thaçi, Haxhi Thaçi, ka ndërruar jetë.

Lajmi u bë i ditur nga kryetari i PDK-së, Memli Krasniqi.

“Me dhembje të thellë mora lajmin për ndarjen nga jeta të Haxhi Thaçit, babait të Presidentit Hashim Thaçi. Sot, pas një beteje të gjatë me sëmundjen, nuk u shua vetëm një njeri, por një baba që i dha Kosovës një çlirimtar, një burrë që me përkushtimin dhe edukatën e tij ndihmoi në lindjen e një epoke të re për kombin tonë”.

“Ngushëllimet më të sinqerta Presidentit Thaçi, familjes Thaçi dhe mbarë kombit shqiptar. Haxhi Thaçi ishte më shumë se një prind – ai ishte një shtyllë e fortë e vlerave atdhetare, një njeri i urtë dhe fisnik, i cili la pas një trashëgimi të pavdekshme në historinë tonë. U prehtë në paqe”, shkroi Krasniqi.

Haxhi Thaçi ishte i shtruar në Qendrën Klinike Universitare të Kosovës në Prishtinë, ku po trajtohej për gjendjen e tij të rënduar shëndetësore.

Më 13 mars 2025, ish-presidenti Hashim Thaçi, i cili ndodhet në paraburgim në Hagë që nga nëntori i vitit 2020, kishte marrë leje për të vizituar babanë e tij në spital.

Vizita zgjati rreth tre orë dhe u zhvillua nën masa të rrepta sigurie.

Pas vizitës, Hashim Thaçi u kthye në paraburgim në Hagë.

Gjatë qëndrimit të tij në spital, qytetarë të shumtë ishin mbledhur për t’i dhënë mbështetje ish-presidentit dhe familjes së tij në këto momente të vështira.

“Baci i mbylli sytë pas takimit të fundit me Babin” – shkruan në rrjete sociale djali i presidentit Thaçi Endrit Thaçi.

Babai i Hashim Thaçit, komandantit legjendar të ushtrisë çlirimtar të Kosovës u nda nga jeta ditën e djeshme pas një lëngate.

Kujtojmë se vetëm para pak ditëve Presidenti Thaçi mori leje nga gjykata e Hagës për të takuar të atin e sëmurë.

Ndër reagimet e para kanë qenë dhe ato nga Shqipëria. Ka qenë Edi Rama që me një postim në rrjetin social facebook ka shkruar “baba iku, krenar Hashim”.