Vdekja e 27-vjeçarit/ Familjarët ngrenë akuza: Kush i dha metadon

Një ndër familjarët e Jani Rustemit i cili u arrestua për vjedhjen e një tapeti dhe vdiq në QSUT, ka thënë se ngjarja ka qenë e qëllimshme. Një një intervistë për “Faxnews”, familjari i tij, Lulëzim Mehmeti apeloi ndaj kryeministrit Rama si dhe institucioneve përkatëse, për të hetuar deri në fund vdekjen e të riut, pasi ata nuk do ta lënë me kaq. Mehmeti u shpreh se familjarët kanë dyshime të shumta se si ai përfundoi në koma, dhe se deri më tani nuk kanë marrë asnjë përgjigje. Ai tha se do e kërkojnë të drejtën deri në Strasburg, dhe nëse shteti nuk merr masa, komuniteti rom do ta marrë vetë drejtësinë në dorë.

“Quhem Lulëzim Mehmeti, jam dhëndri i Jani Rustemit. Ne si familje kërkojmë të drejtën se kush ia mori jetën djalit. Ne si familje kërkojmë të drejtën e atij djali 27-vjeçar, se kush ai mori jetën. Se ja mori jetën shteti, a një individ nuk e dimë. Për një tapet që u arrestua, a për një palë atlete, e arrestuan dhe përfundoi në koma për një muaj dhe sot ndërroi jetë.

I kërkoj kryeministrit Rama dhe të gjitha institucioneve ta gjejnë personin kush ia ka bërë këtë, kush ia mori jetën. Nëse shteti nuk merr masa, komuniteti rom do ta marrë vetë drejtësinë në dorë. Ai nuk kishte asnjë problem shëndetësor, thjesht ka qenë përdorues hashashi. Ai nuk ka përdorur asnjëherë as metadon as heroinë, edhe sikur të kishte marrë 20-30 mg, ajo nuk do e kishte vendosur në koma.

Mua që ditën e parë mjekët më thanë që i kishin dhënë metadonin. Ne kemi dyshime ndaj kërkojmë të dali e vërteta, pasi ai u kap shëndoshë e mirë. Nuk e dimë se kush i kam dhënë këtë dozë, se një mjek, se një policë nuk e dimë. Nuk e dimë se as kush ka qenë ai mjek që e ka kuruar. Do e kërkojmë të drejtën tonë deri në Strasburg, familja e tij po e vajton në shpi, nuk e dimë se çfarë ka ndodh në të vërtetë”, tha ai.

Jani Rustemi, djali i cili përfundoi në koma pasi dyshohet se iu dha një dozë e lartë metadoni, ndërroi jetë pasditen e sotme në QSUT.