“Vendi ynë po shkon në ferr”/ Trump flet nga rezidenca e tij

Donald Trump mbajti mbrëmjen e kaluar fjalimin e tij para qindra mbështetësve në pronën e tij në Florida, pasi ai u bë ish-presidenti i parë i SHBA që u përball me akuza penale. Ish-presidenti 76-vjeçar tha se: “asnjëherë nuk e kishte menduar se diçka e tillë mund të ndodhte në Amerikë. Krimi i vetëm që kam kryer është të mbroj pa frikë kombin tonë nga ata që kërkojnë ta shkatërrojnë atë,”.

Ai tha se SHBA “po shkon në ferr” dhe thotë se edhe njerëzit “që nuk janë fansa të mëdhenj” të tij kanë thënë se kjo “nuk duhet të ndodhë”. Trump pretendon se ajo që po përballet është “ndërhyrje në zgjedhje” dhe pretendon se “një prokuror lokal racist në Atlanta” po përpiqet të “bëjë gjithçka” në fuqinë e tij për ta paditur atë.

Ai tha: “Ky rast i rremë është sjellë vetëm për të ndërhyrë në zgjedhjet e ardhshme të vitit 2024 dhe duhet të hiqet menjëherë”.

Ai pretendon se Biden “kishte dokumente të klasifikuara të cilat i mori kur ishte senator” dhe vazhdoi duke thënë se “ai nuk po ngacmohet dhe përndiqet siç janë njerëzit që punojnë për mua”.

Duke tërhequr vëmendjen te aktakuza e tij, ai thotë se “ky është një persekutim jo një hetim” por “kokat tona janë shumë lart”.

Për herë të parë në histori, një ish-president i Shteteve të Bashkuara të Amerikës është paraqitur në gjykatë si i pandehur nën akuza penale. Prokurorët thonë se Trump u përpoq të ndikonte tek rezultati i zgjedhjeve presidenciale të vitit 2016 duke u përpjekur të bllokonte lajmet që mund ta dëmtonin kandidaturën e tij dhe më pas duke fshehur natyrën e vërtetë të pagesave për të blerë heshtjen.

Akuzat penale rrjedhin nga tre raste të veçanta, ku ish-presidenti dhe bashkëpunëtorët e tij akuzohen se kanë bërë pagesa për të blerë heshtjen e tre individëve gjatë fushatës së tij presidenciale në vitin 2016.

Pagesat, thotë aktpadia, u bënë për të blerë heshtjen e dy grave që pretendojnë se kanë patur marrëdhënie intime me Trump, shumë vite më parë, dhe një pagesë për të blerë heshtjen e një punonjësi të kullës Trump i cili pretendonte se Trump kishte një fëmijë në një lidhje jashtëmartesore.

Trump është akuzuar për 34 vepra penale të falsifikimit të të dhënave të biznesit. Dje ai u dorëzua pranë autoriteteve në Nju Jork dhe deklaroi se ishte i pafajshëm ndaj të gjitha akuzave.

Gjykatësi caktoi seancën e radhës me datën 4 dhjetor. Avokatët e Trump kërkuan që ai të përjashtohej nga pjesmarrja personalisht në seancë për shkak të sigurisë së jashtëzakonshme që kërkohet. Prokurorët kërkuan që gjyqi të caktohet në janar, disa javë para votimeve paraprake të kandidatëve republikanë për zgjedhjet presidenciale të vitit 2024. Avokatët e Trump kërkuan që gjyqi të shtyhej për në pranverë. Gjykatësi ende nuk ka caktuar një datë, sipas njoftimeve deri në momentin e publikimit të artikullit.