Vendimi i Qeverisë/ ID-të dhe pasaportat e skaduara të vlefshme edhe pas 11 majit për emigrantët

Në prag të zgjedhjeve parlamentare të planifikuara për 11 maj 2025, qeveria ka shpallur dy akte normative të reja që zgjasin afatin e vlefshmërisë së pasaportave dhe të letërnjoftimeve elektronike për qytetarët shqiptarë me vendbanim jashtë vendit.

Këto masa janë miratuar në mbështetje të nenit 101 të Kushtetutës dhe me propozimin e ministrit të Brendshëm, dhe kanë efekt vetëm për të siguruar të drejtën e votimit në zgjedhjet e Kuvendit, të shpallura me dekretin nr.399, datë 5.12.2024, nga Presidenti i Republikës.

Sipas aktit normativ për ligjin nr.8668, “Për pajisjen e shtetasve shqiptarë me pasaportë për jashtë shtetin”, afati i vlefshmërisë së pasaportave, i cili përfundonte më 11 maj 2025, do të zgjatet deri më 31 maj 2025. Ngjashëm, në aktin normativ për ligjin nr.8952, “Për letërnjoftimin elektronik të shtetasve shqiptarë”, afati i vlefshmërisë së letërnjoftimit elektronik do të zgjatet në të njëjtën datë – deri më 31 maj 2025 – për qytetarët që kanë vendbanim jashtë vendit dhe janë votues në zgjedhjet parlamentare.

Zgjerimi i afatit të vlefshmërisë së dokumenteve të identifikimit siguron që qytetarët e diasporës, të cilët shpesh përballen me pengesa administrative, të kenë mundësinë e plotë për të marrë pjesë në zgjedhjet e 11 majit 2025.