Vizita e kreut të CIA-s në Rajon/ Paralajmërimet për Kosovën dhe Serbinë

Sipas ‘Danas’, gazetari nga Prishtina, Xhezair Dashi, tha se shefi i CIA-s, William Burns, erdhi në Ballkanin Perëndimor për t’u thënë “udhëheqësve të pamatur dhe aventurierë që kërkojnë vota në Serbi, Bosnjë dhe Kosovë se SHBA nuk do të lejojë që të kompromentohet siguria në rajonin e Ballkanit.

Sipas tij, është shumë e qartë se nga perspektiva e sigurisë së Shteteve të Bashkuara, Ballkani Perëndimor është një “rajon me dy binarë”.

“Me një pistë që shkakton dhimbje koke dhe shqetësim të vazhdueshëm për sa i përket përshkallëzimit të mundshëm të situatës, përkatësisht Serbia me kontrollin e saj mbi popullatën serbe në Bosnje dhe Hercegovinë dhe në veri të Kosovës. Të mos harrojmë se vizitës së kreut të CIA-s i kanë paraprirë dy paralajmërime që kanë ardhur nga SHBA-të ndaj Serbisë dhe Kosovës” – ka deklaruar Dashi, duke theksuar se “Ndihmës Sekretari Amerikan i Shtetit O’Brien, ishte i qartë në thirrjen e tij drejtuar presidentit serb Aleksandër Vuçiç – “për t’u siguruar… që të mos ketë surpriza paraushtarake apo ushtarake”, për të cilat, sic u shpreh ai, ka indikacione nga inteligjenca, se ” formacioni paramilitar i Milan Radoçiçit mund të tentojë të sulmojë veriun e Kosovës”.

Dashi theksoi gjithashtu se stërvitjet e “formacionit paramilitar të terroristit Radoiçiç” nuk kanë ndalur dhe se Perëndimi e di me siguri se ato shtrihen edhe në strukturat shtetërore të Serbisë.

“Kreu i CIA-s, natyrisht, i ka të gjitha këto informacione dhe mund ta ketë informuar Vuçiçin për pasojat” – deklaroi gazetari nga Prishtina.

Dashi theksoi se presidentja e Kosovës Vjosa Osmani ditëve të fundit ka marrë një raport me shkrim “për kërcënime të mundshme me jetët e ushtarëve amerikanë të KFOR-it” në kuadër të “shpalljes së hapjes së urës në Ibër”.

“Në dritën e këtij shqetësimi të madh, kreu i CIA-s u ka treguar liderëve të pamatur dhe aventurierë që kërkojnë vota në Serbi, Bosnje dhe Kosovë, se SHBA-të nuk do të lejojnë të cenohet siguria” – ka potencuar Dashi.