Vrasja/ Akuzat e Berishës, Ndreu: Palaço e faqezi

Kandidati i Partisë Socialiste për Bashkinë e Lezhës dhe kryebashkiaku aktual, Pjerin Ndreu i është përgjigjur kryedemokratit Sali Berisha, i cili e akuzoi se kishte gisht në vrasjen e Ardian Nikulajt. Në një reagim, Ndreu shkruan se e konsideron të neveritshme këtë akuzë. Ai i quan faqezinj të gjithë ata që e kanë përfshirë në këtë ngjarje dhe shton se e kanë bërë këtë retorikë, vetëm për vota.

‘Qe politika e Sali Berishes eshte me gjak, kjo dihet tashme, por qe te shkoje deri ne kete pike sme kishte shku mendja! Te sugjeruar nga politika lokale opozitare qe do te perfitoje politikisht ne kurrizin e nje ngjarje tragjike, morali ka preke fundin! Ndjej neveri per keto funderrina qe prodhojne keto lajme palacosh, me argument te paverteta dhe me deduksione kriminale vetem per nje grusht vota! Kaq per keto faqezinj!’- shkruan Ndreu.

Kryedemokrati Sali Berisha ka hedhur akuza të forta, teksa u shpreh se vrasja e Ardian Nikulajt është bërë për qëllime politike. Në një postim në rrjetet sociale, Berisha shkruan se ngjarja ka ardhur vetëm tre ditë pasi kryeministri Edi Rama hapi fushatën në Lezhë. Ai shton se Nikulaj ka dalë publikisht kundër kandidaturës së Pjerin Ndreut dhe aleancës me Tom Doshin, ndaj dhe është vrarë.

Ardian Nikulaj (Marku) u vra këtë mesditë teksa ndodhej në lokalin e tij në Shëngjin. Një person u fut brenda dhe qëlloi në drejtim të Nikulajt. Më pas u largua pa gjurmë dhe nga çfarë raportohet deri më tani, pasi ka braktisur motorin, ka hipur në një mjet tip ‘Range Rover’ me ngjyrë të zezë e targa angleze. Dyshohet se është larguar në drejtim të Shkodrës. 51-vjeçari Ardian Nikulaj rezulton se ka disa biznese në zonën e Lezhës dhe ka qenë gjithashtu pjesë e politikës. Aktualisht ai garonte në listën e anëtarëve të Këshillit Bashkiak dhe më parë ka kandiduar për deputet në Lezhë në listën e PSD-së.