Zelensky: Trupat e huaja të vendosen në Ukrainë, përpara se të bihet dakord për…

Volodymyr Zelensky hodhi idenë të hënën që trupat e huaja të vendosen në Ukrainë derisa vendi të bashkohet me aleancën ushtarake të NATO-s.

Ai e bëri komentin gjatë një konference të përbashkët shtypi në Kiev me liderin e opozitës gjermane Friedrich Merz, teksa kthimi i afërt i Donald Trump në Shtëpinë e Bardhë intensifikon bisedimet për një marrëveshje të mundshme për t’i dhënë fund luftës 33-mujore të Rusisë.

Ukraina, e cila ka bërë një përpjekje për të marrë një ftesë për t’u bashkuar me NATO-n, ka këmbëngulur gjatë gjithë luftës se ajo ka nevojë për garanci sigurie për të parandaluar Rusinë të nisë një pushtim tjetër pas ndalimit të luftës aktuale.

“Një kontigjent trupash nga një vend apo një tjetër mund të jetë i pranishëm në Ukrainë për sa kohë që nuk është pjesë e NATO-s. Por për këtë ne duhet të kemi një kuptim të qartë se kur Ukraina bëhet anëtare e BE-së dhe kur bëhet anëtare e NATO-s”, tha Zelensky.

Presidenti francez Emmanuel Macron shkaktoi polemika në Evropë në shkurt kur ngriti mundësinë e dërgimit të trupave nga vendet evropiane në Ukrainë, megjithëse ai paralajmëroi se nuk kishte konsensus për këtë çështje.

“Edhe nëse na ftojnë në NATO, çfarë do të ndodh? Kush na garanton sigurinë? Ne mund të mendojmë për këtë dhe të punojmë për propozimin e Emmanuel Macron”, tha Zelensky.

Udhëheqësi ukrainas u tha gazetarëve se shpresonte të telefononte presidentin në largim të SHBA Joe Biden në ditët në vijim për të diskutuar anëtarësimin në NATO.

“Ukraina dëshiron që kjo luftë të përfundojë sa më shpejt. Një rezolutë diplomatike do të shpëtonte më shumë jetë. Ne e kërkojmë atë”, u tha Zelensky gazetarëve.

Në vijim ai shtoi se “mund të ushtrojmë forcë vetëm nëse Ukraina është e fortë. Një Ukrainë e fortë në diplomaci do të thotë një Ukrainë e fortë në fushën e betejës”.