2024, viti më i përgjakshëm për Rusinë në Ukrainë: 27 të vrarë për çdo kilometër të pushtuar

Sipas një hetimi nga BBC Russian, Mediazona dhe një rrjeti vullnetarësh, të bazuar në të dhëna publike si nekrologji, varreza dhe memoriale ushtarake, Rusia humbi mesatarisht 27 ushtarë për çdo kilometër tokë të pushtuar në Ukrainë gjatë 2024-s. Në total, Rusia ka fituar kontroll mbi 4,168 kilometra katrorë, duke paguar një çmim të rëndë njerëzor.

20 shkurti 2024 u shënua si dita më e përgjakshme për Rusinë, kur një sulm me raketa HIMARS goditi një terren stërvitor në Donetsk, duke vrarë 201 ushtarë. Mes tyre ishin edhe të rinj nga Siberia e Lindjes si Aldar Bairov, 22 vjeç, dhe Igor Babych, 32 vjeç, një ish-terapist që kishte punuar me fëmijë me nevoja të veçanta.

Gjatë gjithë vitit 2024, nuk pati periudha qetësie – betejat për Avdiivka, Robotyne dhe më pas drejt Pokrovskut dhe Toretsk sollën mijëra viktima. Sipas Institutit Amerikan për Studimin e Luftës (ISW), vetëm nga shtatori në nëntor 2024 Rusia pushtoi 2,356 km², por me rreth 11,678 të vrarë.

Ekspertët vlerësojnë se numri i vërtetë i viktimave ruse mund të jetë nga 185,000 deri në 260,000, nëse përfshihen dhe luftëtarët e republikave separatiste Donetsk dhe Luhansk.

Rekrutime me pagesa të larta, por pa përgatitje

Për të përballuar humbjet, Rusia ka rritur rekrutimet, duke ofruar pagesa të mëdha njëherësh dhe paga që janë 5–7 herë më të larta se mesatarja lokale. Një pjesë e madhe e vullnetarëve janë dërguar në front vetëm 10-14 ditë pas nënshkrimit të kontratës – me pak ose aspak trajnim ushtarak.

Rajoni me më shumë të vrarë është Bashkortostani, me 4,836 viktima, shumica prej të cilëve nga fshatrat dhe pa eksperiencë luftarake.

Ekspertët paralajmërojnë se këto shifra janë të pjesshme, pasi shumë trupa ende nuk janë rikuperuar nga fronti dhe nuk janë përfshirë në të dhënat publike.