Shpopullimi i Gazës/ Erdogan: Turqia nuk mund ta pranojë politikën e Izraelit

Presidenti turk, Rexhep Taip Erdogan, shprehet se Turqia nuk mund të pranojë politikën e Izraelit për shpopullimin e Rripit të Gazës, ndërsa përsëriti se Izraeli është një shtet terrorist, shkruajnë mediat e huaja. 

“Ne nuk mund dhe nuk do të tolerojmë politikën e shtetit të Izraelit, i cili është rritur duke pushtuar vazhdimisht, rrëmbyer toka dhe masakruar të shtypurit, për ta bërë Gazën të pabanuar”, tha Erdogan në Forumin e Biznesit Algjeri-Turkiye.

Erdogan bëri një vizitë njëditore në kryeqytetin Algjer për t’u takuar me homologun e tij algjerian Abdelmadjid Tebboune dhe për të marrë pjesë në takimin e dytë të Këshillit të Bashkëpunimit të Nivelit të Lartë Turqi-Algjeri, ku presidentët diskutuan gjithashtu sulmet e vazhdueshme të Izraelit në Gaza.

“Sulmet, në të cilat u martirizuan më shumë se 13,000 vëllezër tanë palestinezë, kanë zbuluar edhe një herë fytyrën, synimin dhe qëllimin e vërtetë të Izraelit dhe mbështetësve të tij. Në këtë drejtim, është shumë e rëndësishme që krimet e luftës dhe krimet kundër njerëzimit të kryera nga sundimtarët izraelitë të mos mbeten pa sanksione. Të gjitha vendet të ndërgjegjshme, së bashku me Botën Islamike, kanë përgjegjësinë për të siguruar që Izraeli të mos tentojë përsëri “mizori të ngjashme. Ne duhet ta dimë këtë njëherë e përgjithmonë. Izraeli është një shtet terrorist. Nuk ka nevojë të hezitojmë ta themi këtë. Kjo është e vërteta që ne e dimë. Ky është rasti”, tha ai.

Erdogan shtoi se, Izraeli dhe kryeministri izraelit Benjamin Netanyahu duhet të referohen në Gjykatën Penale Ndërkombëtare (ICC), gjykata me seli në Hagë.