Asociacioni dhe vijat e kuqe/ Isa Mustafa flet për mashtrim

Statuti i ri “evropian dhe modern” i Asociacionit të Komunave të banuara me shumicë serbe që është ofruar nga pesë emisarët evropiano-amerikanë më 21 tetor u tha që, si i tillë, “nuk tejkalon vijat e kuqe të palëve”; përkatësisht as të Kosovës dhe as të Serbisë.

Kjo deklaratë kaloi në heshtje dhe as nuk ngjalli reagime të qeverisë dhe partisë në pushtet, për të cilët, deri kohëve të fundit, secila fjali e ndërmjetësit evropian, Miroslav Lajçak, ishte brum denoncimi për anshmëri ndaj Serbisë dhe padrejtësi ndaj Kosovës.

Për ish-kryeminstrin e Kosovës, Isa Mustafa, ky pretendim se gjoja është arritur një vizion përbashkues ku s’tejkalohen vijat e kuqe të palëve – kushtetueshmëria dhe moskrijimi i një niveli të tretë të pushtetit si vija të kuqe të palës kosovare dhe kërkesave të Serbisë që ajo të konstitutojë tamam nivel të ri pushteti ekzekutiv për komunat të banuara me shumicë serbe si vija të tyre të kuqe – “do të jetë një mashtrim spektakolar”.

Mustafa vlerëson se “Është vështirë të mendohet që një Asociacion, vetëmenaxhim-autonomi substanciale për serbët e Kosovës dhe të jetë krejt kushtetues”, ndërsa deklarimin e Lajçakut se ky Statut e arrin këtë pajtim të pamendueshëm dhe diametralisht të kundërt mes palëve, ai nuk e sheh të mundshëm..

“Të respektohet vijat e kuqe të të dyja palëve (pra, që të jetë brenda binarëve, të cilat po ndërtohen së bashku) do të ishte një vepër spektakolare, por në fakt do të jetë një mashtrim spektakolar” – shprehet i prerë ish kryeministri, sipas të cilit, “Ky mashtrim do të arsyetohet me Banjskën, si: më e mirë kjo zgjidhje se sa të bëhet luftë”. Dhe kjo, konkludon ai, si “një mirazh Serbisë në vend që ajo të sanksionohet”.