Balluku publikon foton me mesazh emocionues: Më shumë se 21 vite nga dita kur iu bashkova skuadrës së Ramës

Zëvendëskryeministrja dhe njëhershëm ministre e Infrastukturës dhe Energjisë, Belinda Balluku ka ndarë një fotografi zyrtare krah kryeministrit Edi Rama dhe ka zgjedhur të shkruar disa rreshta, si rrallëherë. Shënimi lidhet me besimin e saj në postin aktual edhe në këtë mandat të ri.
Balluku thotë se kanë kaluar më shumë se 21 vite nga dita kur ajo iu bashkua skuadrës së Edi Ramës, duke shprehur mirënjohjen për mundësinë që i ka dhënë për të vazhduar detyrën si pjesë e ekipit qeverisës.

“Nuk e kam parë kurrë ftohtë si një punë detyrën time, por si mision për të vënë qoftë një gur në themelet e një shteti që lulëzoi nga gërmadhat e tranzicionit dhe mori formën e talentit dhe dëshirës së Edi Ramës për të na bërë krenar për vendin e shqipeve”, shkruan ajo ndër të tjera.

Postimi i Plotë

Kanë kaluar më shumë se 21 vite nga dita kur iu bashkova skuadrës së Edi Ramës.

Jo rrallë kthehem pas për të kujtuar gjithçka është bërë, jo rrallë mendoj se sa shumë sprova e sfida kemi kaluar në këto dekada, jo rrallë më kujtohen ngjarjet që ndryshuan thelbësisht qasjen e Partisë Socialiste dhe vizionin politik për vendin, por ajo çka ka mbetur e pandryshuar, është forca lëvizëse, pasioni dhe vizioni i Edi Ramës, për të ndryshuar këtë vend në çdo nivel, e për të rendur më shpejt drejt Europës dhe së ardhmes.

Jam thellësisht mirënjohëse Kryeministrit Rama për besimin dhe mundësisë që më dha, për të vazhduar detyrën time si pjesë e ekipit qeverisës. Nuk e kam parë kurrë ftohtë si një punë detyrën time, por si mision për të vënë qoftë një gur në themelet e një shteti që lulëzoi nga gërmadhat e tranzicionit dhe mori formën e talentit dhe dëshirës së Edi Ramës për të na bërë krenar për vendin e shqipeve. Uroj suksese të gjithë kolegëve të mi dhe shpresoj fort që secili prej tyre të kontribuojë me më të mirën e tij në këtë rrugëtim sfidues drejt Europës.