Covid gjatë shtatzënisë lidhet me autizëm dhe vonesa në zhvillim, tregon një studim i ri

Një studim i botuar në revistën Obstetrics and Gynecology analizoi mbi 18,100 lindje në Massachusetts të fëmijëve të lindur nga gra që u infektuan me korona virus që nga muajt e parë të pandemisë deri në një pjesë të vitit 2021.

Fëmijët e lindur nga nëna që kishin kaluar infeksionin e Covid-19 gjatë shtatzënisë kishin një rrezik më të lartë për diagnozë autizmi dhe për probleme të tjera neurologjike, si vonesa në të folur dhe zhvillimin motorik, sipas studimit, raportoi Washington Post.

Autorët e studimit theksuan se, si studim vëzhgues, ai nuk provon se Covid-19 shkakton këto gjendje, por tregon një lidhje mes infektimit të nënës dhe rrezikut për zhvillime të tilla tek fëmijët.

“Nuk është se çdo grua shtatzënë që kalon Covid-19 duhet të mendojë se fëmija i saj do të ketë autizëm. Rreziku absolut është shumë i vogël”, shpjegoi ajo.

Kolegji Amerikan i Obstetërve dhe Gjinekologëve vazhdon të rekomandojë vaksinimin, ndërsa zyrtarët federalë këshillojnë që çdo grua të konsultohet me mjekun e saj.

Çfarë zbuloi studimi?

Studiuesit shqyrtuan të dhënat mjekësore nga 1 mars 2020 deri më 31 maj 2021. Nga 861 gra që rezultuan pozitive për Covid gjatë shtatzënisë, 140 lindën fëmijë që deri në moshën trevjeçare morën një diagnozë neuro zhvillimore.

Shumica e grave nuk ishin të vaksinuara. Studiuesit theksuan se duhen kërkime më të mëdha për të kuptuar rrezikun e mundshëm për gratë që ishin vaksinuar.

Studimi ndërtohet mbi një trup të gjerë kërkimesh që lidhin infeksionet virale gjatë shtatzënisë me zhvillimin e trurit të fetusit. Viruse si rubeola, Zika apo varicella-zoster dihet se mund të shkaktojnë dëmtime të drejtpërdrejta tek fetusi.

Në rastin e Covid-19 dhe gripit, besohet se dëmtimi nuk ndodh nga kalimi i drejtpërdrejtë i virusit, por nga reagimi inflamator i sistemit imunitar të nënës, që mund të ndikojë në mënyrën si formohen dhe lidhen neuronet në tru.