Deputeti gjerman Roth – Vuçiçit: Vrasja e njerëzve është krim i tmerrshëm

Kryesuesi i Komitetit për Punë të Jashtme të Parlamentit të Gjermanisë Michael Roth, teksa ka komentuar paraqitjen propagandistike televizive të presidentit të Serbisë, Aleksandër Vuçiç, lidhur me vrasjen e një pjesëtari të Policisë së Kosovës nga një bandë terroriste në pjesën veriore të vendit të banuar me serbë etnikë, ka kujtuar se vrasje e njerëzve është krim i rëndë.

“Për mua nuk ka rëndësi se nga vijnë viktimat dhe autorët. Nuk më interesojnë fare kombësitë apo etnitë. Edhe kosovarët edhe serbët meritojnë të jetojnë në paqe, siguri, dinjitet, liri dhe kufij të sigurt”, ka shkruar deputeti gjerman në llogarinë e tij zyrtare në platformën “X”

Më herët, deputeti gjerman kishte shprehur kureshtjen për të parë se çfare ka për të thënë presidenti serb lidhur me këtë rast, duke shtuar se bandat kriminale me mbështetjen e drejtpërdrejtë të Beogradit janë përsëri përgjegjëse për aktet e dhunës në veriun e trazuar të Kosovës.

”Dhuna brutale thjesht nuk mbaron kurrë. Tani ka vdekur një polic kosovar. Bandat serbe (me mbështetje të drejtpërdrejtë nga Beogradi) ndoshta janë përsëri përgjegjëse për këtë. Jam kurioz të shoh se çfarë justifikimi do të ketë Vuçiq”, ka shkruar me heret Roth

Gjithashtu edhe raportuesja e Bashkimit Evropian për Kosovën, Viola von Cramon, ka dënuar sulmin në veri, ku u vra një polic i Kosovës dhe ka theksuar se duhet të vendoset prani e fuqishme e KFOR’it në Veri të Kosovës.

Von Cramon e ka quajtur sulm të orkestruar si edhe ka kërkuar që të hetohet pjesëmarrja eventuale e strukturave serbe nga Beogradi.