Fundi regjimit islamik/ Princi i Kurorës thirrje Donald Trumpit: Bëje Iranin sërish madhështor

Prinici i Kurorës së Iranit, Reza Pahlavi, i cili ka jetuar në ekzil për gati 50 vjet, u shpreh se SHBA duhet të përfshihet në përpjekjet për të ndihmuar në rrëzimin e regjimit islamik në Teheran, njoftoi ai gjatë një interviste për Fox News.

Duke iu drejtuar drejtpërdrejt Presidentit amerikan Donald Trump, Pahlavi tha: “Ka një arsye pse njerëzit në Iran po riemërtojnë rrugë me emrin tuaj. Fjalët tuaja të solidaritetit me popullin iranian dhe administrata juaj kanë pasur një efekt të jashtëzakonshëm pozitiv.”

Ai bëri thirrje që kjo mbështetje të shënohet përgjithmonë me lirimin e vendit, duke ripërdorur një shprehje të njohur: “Le të shpresojmë që ne mund ta vulosim këtë trashëgimi përfundimisht duke çliruar Iranin, në mënyrë që ne dhe ju të bëjmë Iranin përsëri madhështor.”

Ai theksoi se është i nevojshëm një plan për një tranzicion të qetë, duke theksuar se ai vetë do të sigurohet që ky proces të arrihet si një forcë unifikuese.

I pyetur nëse mbështet zgjedhje të lira, Pahlavi shmangu një përgjigje direkte, duke thënë se “puna e tij aktuale është të sigurojë që ne të arrijmë atë tranzicion, që si një arbitër i ndershëm të jem një forcë unifikuese”.

Ai gjithashtu foli për parandalimin e skenarëve të kaosit, të ngjashëm me debatet e pasluftës së Irakut, duke nënvizuar se ekonomia duhet të stabilizohet dhe se për këtë ai pretendon se ka plane shumë gjithëpërfshirëse.

Pahlavi ka bërë thirrje gjithashtu për grevë të përgjithshme kombëtare në sektorët kryesorë ekonomikë, të cilën ai pretendon se po nis, dhe tha se po sheh largime nga sistemi aktual si pjesë e tranzicionit.

Ai beson se populli iranian është “inspiruar” nga veprimet e Trump në Venezuelë, duke thënë se çdo herë që një vend çlirohet, kjo dërgon një mesazh pozitiv dhe nxitës për kombet që ende përballen me regjime të padëshiruara.