Genc Pollo iu bën leksion gazetarëve: Ja për çfarë duhet ta pyesni Ramën herën tjetër

Genc Pollo thotë se gazetarët shqiptarë, nuk dinë ta pyesin kryeministrin.

Ai iu ka bërë gati disa pyetje atyre, për t’ia parashtruar Ramën në konferencën e ardhshme.

Postimi i Pollos

Mbasi pashë në internet video nga pyetje-përgjigjet në konferencën e shtypit të kryeministrit Rama të premten (25 gusht) po shkruaj një shënim me shpresë se mund të jetë i dobishëm për gazetarë profesionistë e kurajozë. Për sot dhe për nesër e pasnesër.

Rama duke theksuar pa mbarim e formalisht me të drejtë përgjegjësisë personale të vartësve të tij (të kapur në keqbërje nga gjyqësori) rrekej në fakt të evitonte përgjegjësinë e vet personale dhe institucionale.

Nëse gazetarët që ndjekin skandalet e fundit kanë mbaruar me pyetjet konkrete faktet dhe duan të fokusohen tek përgjegjësia personale e poltikanëve përgjegjës dhe te pasojat konkrete në vijim të kësaj përgjegjësie personale atëhere lipset të bëjnë nga një pyetje konkrete, të thjeshtë e të fokusuar e konkrete. Me premisën e sforcuar se Rama ishte nisur për mirë por vetëm muajt fundit po e kuptonte se që nga v.2014 e pas shpinës së tij dhitë qeveritare kishin mësyrë në pemishte.

Disa shembuj më poshtë:

1- Zoti kryeministër! A duhej të ndërhynit ju me auditin tuaj kur për abuzimet e korrupsionin që sot zbardh akuza penale para disa vitesh ngriti alarmin opozita? Ose  aksh OJF ? Ose Kontrolli i Lartë i Shtetit?

2-Pse duhej të priste një kryeministër dorëjashtë prangat e akuzat mbi ministrat e tij për të kuptuar se cfarë kishte ndodhur? Dmth për të kuptuar se cfarë kishte firmosur e shkaktuar?

3- Qeveria juaj ka kundërshtuar nismën për pezullimin e sekuestrimin e në rastin e PPP-ve korruptive me shpjegimin se rrezikohej arbitrazhi (për Agon Channel nuk kishit druajtje). Por tani që kjo u bë jo me nismën tuaj por me nismën e një organi jashtë qeverisë a ndjeheni keq? A mendoni që ju thjesht gabuat? Apo ndikuan interesa të caktuara?

4- Ju i keni quajtur inceneratorët “krenaria ime”. A e dinit atë kohë që koncesionari në arrati arkëtonte miliona taksapará dhe nuk ka ndërtuar edhe sot një incenerator si p.sh. në Tiranë?

5- Me njohuritë e sotme do e tërhiqini shprehjen “krenaria ime”?

6- A quani normale që personat të cilët sipas aktakuzës janë të përfshirë dhe me gjasë me përgjegjësi në dy skandalet “inceneratorët” e “sterilizimi” të vazhdojnë të jenë ministra, deputetë në grupin PS dhe drejtorë në kryeminstrinë tuaj?

A mos duhet ndonjë lëvizje e ndryshim aty për të ruajtur besimin e publikut tek këto institucione dhe për të mbrojtur nga risku paratë e taksapaguesve shqiptarë dhe europianë?

Po e ndërpres këtu me një gjysëm dyzine pyetje. Gjithkush mund të vazhdojë të shtojë pyetje si t’ja marri mendja. Edhe më e rëndësishme është që këtë ta bëjnë gazetarët. Dhe që t’oa drejtojnë pyetjet Ramës në mundësinë e parë; nëse do e kenë e kurdo që t’a kenë. Edhe pse me gjasë  kryeministri do të japë përgjigje pa përgjigje.