Ideatori i “Botë serbe” akuzon se të tjerët janë luftënxitës

Deputeti i vetëm shqiptar në parlamentin e Serbisë, Shaip Kamberi, ka reaguar pas akuzave të presidentit serb, Aleksandër Vuçiç, kinse shqiptarët po proklamojnë idenë e “Shqipërisë së Madhe”, kjo pas shfaqjes së flamurit “Autoctonus”, në koncertin e organizuar në Tetovë për nder të vizitës së kryeministrit të Kosovës, Albin Kurti.

Kamberi përmes një shkrimi në Facebook, të cilin e ka titulluar “Kush po e destabilizon Ballkanin?”, ka thënë se në Beograd dhe nëpër shumë qytete në Serbi, sikurse edhe në shtetet tjera ku jetojnë serbët, “me stilin e zjarrit, po paraqiten murale me tekstin ‘Kur ushtria të kthehet në Kosovë’

Presidenti autokrat serb, Aleksandër Vuçiç, pohoi ai, “ditëve të fundit, sidomos pas disa editorialeve të prestigjiozeve botërore që po e kritikojnë qasjen e tij në politikat rajonale, ka filluar të lançoi akuza në drejtim të shqiptarëve për tentative të destabilizimit të Ballkanit përmes idesë së ‘Shqipërisë së Madhe’.Ideatori i ‘Botës serbe’, ide e ideologji politike, vazhdimësi e politikës së Sllobodan Millosheviç-it për shtetin që përfshinë të gjithë serbët, i cili me veprime konkrete në Kosovë, Bosnje e Mal të Zi po kërcënon paqen në Ballkanin e brishtë, po akuzon të tjerët se janë luftënxitës”, theksoi Kamberi teksa dhe shtoi – “Presidenti serb në vend se të fajësoj të tjerët dhe fajtorin të gjejë në Shkup, Tetovë, Prishtinë, Ulqin apo Bujanoc e Preshevë, është mirë të kthejë kokën ka Beogradi, Krushevci, Banjaluka, e qytetet e tjera në Serbi e ku jetojnë serbët për të ndaluar fushatat histerike e të pakuptimta rreth aspiratave imagjinare për ‘kthim triumfal në Kosovë’”.