“Kamera nuk regjistroi”/ A po manipulon pronari i lokalit vrasjen e Eglit? (DYSHIMET)

Vrasja e 42-vjeçarit Egli Proga në Pogradec nga Denis Meçe, e cila mbetet ende me shumë enigma, dyshohet se po tentohet të manipulohet jo vetëm nga institucionet, por edhe nga pronari i lokalit ku ndodhi krimi.

Dëshmia e këtij të fundit e dhënë për autoritetet është kontradiktore nga dëshmitë e dhënë nga dëshmimtatër e tjera. Referuar deklaratës së tij në dosjen e Prokurorisë, pronari i lokalit ka deklaruar se Denis Meçe dhe Egli Proga nuk kanë debatuar dhe as nuk janë konfliktuar për sa kohë ishin në ambientet e brendshme të lokalit.

Ndërkohë më pas, edhe pse pranon se ndodhej vetëm disa metra larg tyre, ai pretendon se nuk ka dëgjuar gjë, teksa sipas tij, as kamerat e sigurisë të vendosura në lokal nuk kanë regjistruar filmimet.

“Nuk kanë bërë asnjë lloj debati apo konflikti midis tyre dhe ka ndejtur shumë pak kohë pasi vetëm gjysmën e birrës ka pirë dhe është ngritur ka shkuar në tualet. Kur doli jashtë kanë thirrur njerëzit me zë të lartë që kërkonin ujë dhe kam dalë me të shpejtë jashtë dhe e pashë atë të shtrirë në tokë, e ngrita për t’i dhënë ndihmë deri sa erdhi ambulanca që e mori. Kamera që kam unë tek lokali e kam kontrolluar dhe nuk regjistronte fare por vetëm sa sheh në moment dhe asgjë më tepër” – ka deklaruar ai.

Autoritetet dyshojnë se filmimet e kamerave të sigurisë mund të jenë fshirë. Kjo nisur edhe nga fakti se Policia e Pogradecit reagoi me shumë vonesë.

Fillimisht autoritetet policore raportuan se Egli Proga kishte humbur jetën pasi ishte rrëzuar, edhe pse ngjarja kishte ndodhur në mes të ditës dhe në sy të qytetarëve.

Reagimi i Policisë së Pogradecit erdhi vetëm pas denoncimit të së vërtetë në media, duke arrestuar Denis Meçen, pas orës 01:00 të mesnatës, teksa krimi kishte ndodhur rreth orës 18:00 të pasdites të së shtunës.

Si për familjarët e Egli Progës, po ashtu edhe për banorët e tjerë të zonës, Denis Meçe dhe shokët e tij njiheshin si një grup gjobëvënie në Pogradec. Dyshohet se Denis Meçe i kishte kërkuar xhiron ditore të kafenesë Egli Progës, por 42-vjeçari kishte refuzuar ta paguante “gjobën” duke i thënë se kishte dy fëmijë për të rritur.

Kjo dyshohet se ka qenë dhe shkaku pse Denis Meçe e ka rrahur brutalisht 42-vjeçarin Egli Proga, duke i marrë jetën dhe duke i lënë dy fëmijët e tij jetimë.

Familjarët e viktimës akuzojnë institucionet për mosveprim të qëllimshëm, teksa sipas tyre, në këtë rast kemi të bëjmë me një vrasje në bashkëpunim.

29-vjeçari Denis Meçe njihet si një person problematik në zonë, kjo edhe për shkak se kishte mbështetjen e dajës së tij, Valter Gora, një ish-drejtor me “pushtet rilindas” në Pogradec, i cili ka mbajtur poste të rëndësishme në juglindje, i përfshirë në shumë afera, si dhe i arrestuar për korrupsion.