Kosova as lejon e as ndalon dinarin/ Interpretimi i çuditshëm i Bislimit

Zëvendëskryeministri i Kosovës, Besnik Bislimi, në një konferencë për shtyp, tha se vendimet e Bankës Qendrore të Kosovës (BQK) vetëm synojnë të mbrojnë integritetin e sistemit financiar të vendit, dhe shtoi se rregullorja e BQK-së “as s’e lejon, as s’e ndalon dhe as s’merret me dinarin serb” ngaqë asnjëherë s’ka qenë në fokus ndalimi i ndonjë valute specifike.

Ai deklaroi se rregullorja e ndryshuar e BQK-së për operacionet me para të gatshme, ku specifikohet se monedha e vetme që lejohet për kryerjen e transaksioneve është euro dhe rrjedhimisht, përjashtohet dinari serb në Kosovë, theksoi se asnjë qytetar nuk ka arsye të frikësohet nga zbatimi i rregullores së re që pritet të hyjë në fuqi sot,1 shkurt 2024.

Shtetet e Bashkuara të Amerikës dhe Bashkimi Evropian kërkuan nga Qeveria e Kosovës që ta pezullojë zbatimin e rregullores dhe t’u japë kohë serbëve lokalë, megjithatë zëvendëskryeministri kosovar nënvizoi se rregullorja nuk do të ndikojë në komunitetet me shumicë serbe.

“Duhet të bëhet e qartë që kërkesa parësore është sigurimi i një tranzicioni të lehtësuar dhe siguria te qytetarët serbë që implementimi nuk nënkupton ndalim të transfereve nga Serbia. Menaxhmenti i BQK-së ofroi opsione se si mund të rregullohet kjo pa shkaktuar vështirësi dhe paqartësi te qytetarët serbë që kanë operuar me dinarë deri më tani” – deklaroi Bislimi

Ai njoftoi gjithashtu se më 1 shkurt nuk do të nisin masat ndëshkuese për qytetarët që nuk e zbatojnë rregulloren e BQK-së, por se ekzekutivi do të angazhohet për të mundësuar një periudhë më të gjatë tranzicioni dhe për komunikim më të qartë dhe efektiv publik me komunitetin serb në Kosovë, duke thënë se BQK-ja do të flasë edhe me Banken Qendrore të Serbisë. Në zonat e banuara me shumicë serbe në Kosovë, përveç valutës euro, deri tani është përdorur edhe dinari. Në katër komunat veriore – Mitrovicë e Veriut, Leposaviq, Zveçan dhe Zubin Potok – çmimet nëpër dyqane janë shënuar me dinarë. Viteve të fundit është praktikuar edhe importimi i dinarëve nga Serbia, por nga 1 shkurti kjo praktikë pritet të ndalet.