Kosova shkon në zgjedhje të jashtëzakonshme/ Asociacioni detyron Kurtin për vendimin

Nga analistët politikë po paralajmërohen zgjedhje të parakohshme në Kosovë, për shkak të Asociacionit të komunave me shumicë serbe. Sipas tyre, themelimi ose refuzimi i Asociacionit është barrë e rëndë për kryeministrin, Albin Kurti, prandaj në fillim të vitit 2024, mund të priten zgjedhje të parakohshme në vend.

Analisti politik, Artan Muhaxhiri, tha se Asociacioni pritet të bëhet shkas që vitin e ardhshëm të ketë zgjedhje të reja në Kosovë. Sipas tij, kryeministri Albin Kurti është në një pozitë tejet të palakmueshme për cilindo veprim që ai do marr për Asociacionit. Sipas tij, mosthemelimi i Asociacionit ka alternativë vetëm izolimin e Kosovës, prandaj në bazë të rrethanave të reja duhet të ketë një rilegjitimim politik në vend.

Në anën tjetër, edhe njohësi i rrethanave politike, Dritëro Arifi i sheh të mundshme zgjedhjet e reja në Kosovë. Ai u shpreh se Kurti e ka delegjitimuar veten me pranimin e Asociacionin dhe me themelimin e tij në praktik duhet t’i drejtohet sovranit për legjitimet të ri.

Kurti së fundmi ka ofruar mundësinë që vitin e ardhshëm të shkruajë një draft modern evropian të statutit të Asociacionit të komunave më shumicë serbe. Duke iu përgjigjur të dërguarit special të Bashkimit Evropian (BE) për dialogun Kosovë-Serbi, Miroslav Lajçak, i cili gjatë kësaj jave deklaroi se draft-statuti i Asociacionit është çështje e brendshme e Kosovës, Kurti ka thënë se ai mund ta shkruajë një draft-statut në bashkëpunim me ministrat Nenad Rashiq dhe Elbert Krasniqi.