‘Kosova urgjentisht ta themelojë Asociacionin, prej kohësh e ka detyrim ligjor’

Bashkimi Evropian, permes zedhenesit Peter Stano ka kërkuar nga Qeveria e Kosovës që “urgjentisht” te themelojë Asociacionin e Komunave me Shumicë Serbe, por, Qeveria refuzon që ta dërgojë në Kushtetuese draftin e BE-së, duke kërkuar nga Unioni që atë draft fillimisht ta dërgojë në Komisionin e Venecias.

Nga ana tjetër, sipas presidentes së Kosovës, Vjosa Osmani, Asociacioni i pakëson të drejtat e qytetarëve serbë në Kosovës dhe assesi e kundërta.

Këto komente, Osmani i ka bërë në një intervistë për “Zërin e Amerikës” më 10 korrik ku ka theksuar se në raport me qytetarët, nuk duhet të krijohet përshtypja se ky mekanizëm i ndihmon qytetarëve serbë në Kosovë.

Vitin e kaluar, BE-ja ua prezantoi palëve një draft-statut për Asociacionin, i cili u pranua në parim, por që më vonë kryeministri Kurti, e vlerësoi si “non-paper”.

Kujtojme gjithashtu se Kosova dështoi të futej në agjendën e takimit të Komitetit të Ministrave në Këshillin e Evropës, i mbajtur në mes të majit në Strasburg, pasi shtetit iu vendos kusht që të lëvizte përpara me themelimin e Asociacionit të Komunave me Shumicë Serbe.

Një ditë para takimit në Strasburg, ministrja e Punëve të Jashtme dhe Diasporës, Donika Gërvalla, përmes një letre njoftoi Këshillin e Evropës se Kosova synon që të hartojë një draft-statut për Asociacionin dhe ta dërgojë në Kushtetuese deri në fund të majit, në këmbim të pranimit të shtetit në këtë organizatë për të drejtat e njeriut.