Connect with us

Shkrime

Makineria Gëbelsiane/ Përballë bajlozit, 81 vjeçari Sali Berisha, si vera e vjetër, korri një rezultat spektakolar

Nga Agim Xhafka 
Dua ta them që në fillim se rezultati që mori PD më 11 maj qe spektakolar. Besoj, kështu mendojnë plot si unë. Ngaqë ai në garën për zgjedhje përballë kishte jo PS, por bajlozin shtet. Veshur me policinë, me SPAK-un, me administratën si parzmore dhe me median gjuhënepërkë që helmoi krejt mjedisin. U shtoj këtyre dhe tallavanë e fushatës së Ramës, që e ndërtoi mbi fyerje, sharje, pështyma, e në fund Berisha ia arriti të marrë 500 mijë vota. Më shumë them, po dalin në dritë mijëra fakte për grabitje votash, por dhe kaq është një rezultat mbresëlënës.

Tani makineria gebelsiane ka nisur fushatën të ikë Berisha. Është 81 vjeç, është i moshuar e tërrci e vërrci.

Së pari, një kryetar partie ikën nëse me vota humbet besimin e të vetëve.

Së dyti, mosha në politikë është eksperiencë, përvojë, si vera e vjetër.

Së treti, Berisha 81-vjeçar është riosh para shoqërisë shqiptare me mendje e zakone të mykura. Para një mjedisi që mendon e sillet si 181-vjeçar. Që voton një trushkulur, i cili dëboi popullin nga Shqipëria, që për 12 vite gënjeu për çdo gjë nga shëndetësia, arsimi, pagat, pensionet, që masat i quan çyrykë, që ka ngritur sistemin e sigurimit famëkeq me patronazhistët, që fut në burg opozitën, që po shkatërron vendin. Ja, ky është mjedisi që do të largohet Berisha nga PD.

Këmbëngulin se nuk u doli parashikimi ogurzi. Se pluralizmi vërtet u godit, u trondit, po rezistoi. Këmbëngulin se ata, pa Berishën, mendojnë se do lundrojnë të qetë në detin e grabitjeve.

Berisha si Trump, është vërsnik me të e binjak në ide. Ka moshën, por ka edhe fuqinë. Ka vitet, por edhe frymën për të qëndruar përballë të keqes më të madhe që ka parë vendi ynë. Një e keqe pasuruar me vjedhje, me grabitje, por dhe e fuqizuar me shumë pushtet. Ja pse “humbja” e PD-së më 11 maj ishte një fitore e madhe. Që do lexohet e tillë sidomos pas reagimit të ndërkombëtarëve.

Related Topics:
Advertisement