Me pamje të ndryshuar dhe dokumente të falsifikuara, si u ndalua vrasësi i Nikulajt në Marok

Ruben Saraiva, portugezi që është vënë në pranga për vrasjen e biznesmenit Ardian Nikulaj është prezantuar me dokumente të falsifikuara para autoriteteve marokene në momentin që është ndaluar. Më 8 maj, ai ka udhëtuar nga një aeroport i Maltës në drejtim të Marokut, ku është ulur në aeroportin e Rabatit. Policia ka marë dijeni për këtë udhëtim dhe përmes ndihmës së ndërjelltë që Interpol Tirana i ka kërkuar Interpol Rabatit dhe është bërë i mundur ndalimi i Saraivës.

Saraiva në momentin e ndalimit mësohet se nuk ka bërë rezistencë, por është prezantuar me të tjera dokumenta dhe është shprehur se ka shkuar në Marok për qëllime turistike. Madje, edhe në pamje është vënë re se ka bërë ndryshime. Policia ka verifikuar se dokumentet ishin të falsifikuara dhe e ka vënë në pranga portugezin.

Duke qenë se Shqipëria dhe Maroku nuk kanë një marrëveshje ekstradimi, autoritetet përkatëse në të kaluarën kanë përdorur në disa raste parimin e reciprocitetit të ndërsjelltë, ndaj ekziston mundësia që Saraiva të shkëmbehet me ndonjë person të shpallur në kërkim nga autoritetet marokene dhe që mund të jetë ndaluar në Shqipëri.

SI NDODHI VRASJA?

Ardian Nikulaj u vra më 19 prill brenda lokalit të tij në Shëngjin. Porositës dhe organizator është Edmond Haxhia i cili ka rënë në pranga, së bashku me tre britanikë Thomas Mithan, Steve Hunt dhe Harriet Bridgeman. Të katër këta janë prangosur, pasi autoritetet britanike kanë pranuar si të ligjshme kërkesën e bërë nga Policia e Shtetit. Për këtë ngjarje mbetet në kërkim Harry Simpson, i akuzuar gjithashtu si bashkëpunëtor.

Ruben Saravia iku nga Shqipëria përmes Doganës së Kapshticës, bashkë me britanikun Harry Simson, në drejtim të Greqisë. Britanikët dyshohet se kanë qenë informatorë, ata kanë qëndruar pikërisht në resortin në pronësi të biznesmenit Ardian Nikulaj dhe sipas hetuesve, ata kanë vëzhguar për ditë me radhë lëvizjet e tij dhe të stafit, të cilat më pas ia raportonin portugezit Ruben Saraiva.