Mediu karshillëk viktimave të gërdecit, nga SHBA na shuan merakun që kemi: Takim pune me LaCivita

Fatmir Mediu thotë se ka zhvilluar një takim pune me Chris LaCivita, drejtues i fushatës së PD-Aleanca për Shqipërinë Madhështore.

Në takim me ta ka qenë edhe Phil Griffin, një personazh i njohur në botën e televizionit dhe ish-president i MSNBC.

Në një postim në Facebook, Mediu njoftoi se duke nisur nga java e ardhshme, ekipi i LaCivita do të jetë i pranishëm në Shqipëri për të ndihmuar opozitën deri më 11 maj.

“Mbas një dreke pune me strategun e fushatës Trump dhe drejtuesin e fushatës së PD-Aleanca për Shqipërinë Madhështore Chris LaCivita dhe Phil Griffin.

Prej javës tjetër ekipi i Chris do jetë non stop në Shqipëri në krah të opozitës deri në fitoren në 11 Maj” – njofton Mediu në Facebook, teksa ka postuar një foto nga rruga me dy personazhet e përmendur.

Tani zakonisht takimet e punës bëhen në zyrë, jo në rrugë, por Mediu na ka mësuar me këto “takime”.

Fatmir Mediu i është shmangur seancës gjyqësore për Gërdecin pak ditë më parë.

Ndërsa mungoi në sallën e gjyqit, ai postoi një video nga Amerika me Chris LaCivita.

“Jam rrugës për në Shqipëri. Mezi pres të kthehem. Shqipëria Madhështore sërish”, shprehet LaCivita në videon e postuar nga Mediu.

Video u postua edhe nga Berisha, që shkruan: “Po vjen sherifi”.