Ministri i Jashtëm rus njofton takimin e ri Rusi-SHBA këtë javë

Ministri i Jashtëm rus SergeY Lavrov tha të hënën se një takim i ri midis Rusisë dhe SHBA-ve do të zhvillohet më vonë këtë javë.

Duke folur në një konferencë shtypi me homologun e tij turk Hakan Fidan në Ankara, Lavrov tha se bisedimet e plota Rusi-SHBA janë caktuar për këtë javë për të adresuar pengesat në funksionimin e misioneve diplomatike.

Lavrov tha gjithashtu se e informoi Fidanin mbi rezultatet e bisedimeve të javës së kaluar me SHBA-në në Arabinë Saudite.

“Ne i kemi informuar në detaje miqtë tanë turq për bisedimet ruso-amerikane që u zhvilluan më 18 shkurt në Riad, të cilat u vlerësuan shumë për sa i përket mundësisë për të pasur më në fund një dialog normal, pavarësisht kontradiktave të shumta që, natyrisht, vazhdojnë”, tha ai, raportoi Anadolu.

I pyetur për perspektivat e zgjidhjes së konfliktit ukrainas, diplomati i lartë rus tha se Moska është e gatshme për bisedime me Ukrainën, Evropën dhe çdo palë të gatshme, por se lufta do të pushojë vetëm kur të arrihet një zgjidhje e pranueshme për Moskën.

Ai kujtoi se Rusia disa herë shpalli armëpushim, por se Ukraina i përdori ato për të përforcuar pozicionet e saj.

“Ne jemi të gatshëm të negociojmë me Ukrainën, Evropën dhe çdo përfaqësues që dëshiron të ndihmojë në arritjen e paqes me mirëbesim, por ne do të ndalojmë së luftuari vetëm kur këto negociata të japin një rezultat të fortë dhe të qëndrueshëm që i përshtatet Federatës Ruse”, tha ai.

Ai tha gjithashtu se një marrëveshje me Ukrainën u arrit në Stamboll në prill 2022, por ish-kryeministri britanik Boris Johnson e bllokoi atë dhe Perëndimi pengoi zbatimin e saj për të dobësuar Rusinë.

Sipas Lavrov, Moska pret emërimin e një përfaqësuesi amerikan për negociatat me Rusinë për zgjidhjen e konfliktit ukrainas.

Ai gjithashtu vuri në dukje se mos-anëtarësimi i Ukrainës në NATO duhet të jetë një domosdoshmëri në çdo marrëveshje paqeje të ardhshme.