Muaji i Shenjtë i Ramazanit/ Rama shtron iftar: Na bën bashkë ndjesia e përkatësisë së diçkaje të njëjtë

Kryeministri Edi Rama, me iniciativë edhe të bashkëshortes së tij Linda Rama, ka shtruar një darkë iftari me rastin e Muajit të Shenjtë të Ramazanit.

Në fjalën e tij, para përfaqësuesve të komunitetit mysliman, por edhe politikanëve e njerëz nga bota e medias dhe artit, Rama ka thënë se është virtyt t’i nënshtrohesh disiplinës së fortë të agjërimit në këtë muaj që jo më kot quhet i madhërishëm pra lartësues.

“Edhe unë njësoj si agjëruesit mezi e pres këtë iftar bashkë me Lindën e këdo që angazhohet. Na bashkon ndjesia e përkatësisë ndaj diçkaje të njëjtë. Pa u munduar ti vëmë emër i ndjejmë afërsinë e pakufizueshme. Vakti i iftarit nuk është i pazakonshëm. Është një ndarje buke mes më të fortëve, atyre që duke agjëruar mposhtin dobësitë e trupit…  Është virtyt ti nënshtrohesh disiplinës së fortë të agjërimit në këtë muaj që jo më kot quhet i madhërishëm pra lartësues. Unë sot bëj pjesë te kategoria e më pak  të fortëve. E shoh të virtytshme dhe uljen e jo agjëruesve në tavolinën e iftarit”, tha Rama.