Ndëshkimi i Serbisë, flet eurodeputeti holandez, Reuten

Eurodeputeti holandez, Thijs Reuten, duke folur për situatën në Kosovë pas sulmit terrorist në veri, tha se është e qartë se cila palë po e destabilizon situatën, duke kërkuar nga BE-ja që ta ndëshkojë Serbinë. “Pavarësisht kritikave të shumta për muaj të tërë nga ana e Parlamentit, sanksione janë vendosur vetëm ndaj Kosovës dhe jo ndaj agresorit, shkakut kryesor të destabilizimit dhe provokimeve që kemi parë prej kohësh”, deklaroi Reuten, I cili gjithashtu ishte i qartë në kërkesën e tij, duke thënë se Bashkimi Evropian duhet ta ndëshkojë Serbinë. “Unioni Europian duhet të braktisë politikën katastrofale të pajtimit me Vuçiçin, sepse nuk po funksionon. Sa herë Vuçiç është kthyer nga Brukseli në Beograd dhe me krenari ka treguar se nuk ka firmosur gjë, Komisioneri Varhelyi i ka shkuar në derë me 600 milionë euro! Kjo duhet të marrë fund!” – deklaroi eurodeputeti holandez. Për Reuten, është me rëndësi rikthimi në tryezën e dialogut, por vetëm pasi të jenë ndalur provokimet. “Çdo gjë që ndodhi, jo vetëm gjatë javës së shkuar por edhe në muajt pas Marrëveshjes së Ohrit, hyn në listën e gjatë të provokimeve. Duhet krijuar atmosfera e duhur që palët të ulen në një tryezë sërish dhe të punojnë për normalizimin”, nënvizoi Reuten si dhe kritikoi edhe marrëdhënien e afërt mes Serbisë dhe Rusisë. Sipas tij, takimi i Vuçiqit me ambasadorin rus në Beograd, vetëm një ditë pas sulmit të Banjskës, është tregues se presidenti serb nuk e merr seriozisht Bashkimin Evropian. Kujtojmë se më 24 shtator, një grup i armatosur terrorist sulmoi Policinë e Kosovës në Banjskë të Zveçanit, duke lënë të vrarë rreshterin Afrim Bunjaku.