Nën arrest shtëpie/ Kryebashkiaku i Tropojës: Nuk do të merrem me ata që shpifin…

TROPOJË- 

Postimi i Plotë:

Të nderuar qytetarë të Tropojës, Gjatë këtyre viteve në krye të Bashkisë Tropojë, kam pasur gjithmonë një angazhim të hapur dhe transparent për të ndarë me ju çdo aktivitet dhe zhvillim bashkiak. Nuk kanë qenë kohë të lehta për mua dhe stafin e Bashkisë, pasi shërbimi ndaj qytetarëve dhe përmbushja e nevojave të komunitetit janë të shumta. Por, me punë, përkushtim dhe sakrificë, ja kemi arritur që të kthejmë Tropojën – dikur të braktisur – në një vend të jetueshëm për banorët e saj dhe, njëkohësisht, shumë tërheqës për mysafirë e turistë nga e gjithë bota. Në këtë prag fundviti, dua të shpreh mirënjohjen time për qytetarët e Malësisë së Gjakovës, të cilët më kanë mbështetur pa rezervë dhe kanë besuar në punën time. E gjithë kjo punë ka qenë e udhëhequr nga një parim të cilin e besoj thellë: Tropoja vjen e Para.

Një falënderim të veçantë për stafin tim, i cili ka qenë gjithmonë pranë meje dhe ka treguar profesionalizëm dhe angazhim të jashtëzakonshëm, sidomos gjatë tre muajve të fundit. Përveç shërbimeve bazike, kemi ndërhyrë në çdo cep të Tropojës, duke realizuar dhe rehabilituar projekte infrastrukturore që kanë përmirësuar jetesën e qytetarëve. Kemi menaxhuar me kujdes fondet e Bashkisë Tropojë dhe, po ashtu, kemi pasur mbështetje të vazhdueshme nga Kryeministri Edi Rama për projekte madhore, si ndërtimi i nyjës që lidh vendlindjen tonë me Malin e Zi, si dhe investime të rëndësishme në infrastrukturën arsimore dhe shëndetësore Angazhimi dhe vullneti im janë akoma më të forta për të realizuar një Tropojë moderne, një model për turizmin dhe kulturën.

Po punohet intensivisht për përfundimin e rikualifikimit urban të qytetit, përfshirë ndërtimin e fasadave dhe riparimin thelbësor të kompleksit muzeal të qytetit, që do të shërbejë si një atraksion kulturor dhe turistik për të gjithë. Falenderime bashkëpunimit të shkëlqyer me donatorët euroatlantikë, të cilët kanë mundësuar hapjen dhe funksionimin e tre qendrave rinore moderne në Tropojë. Këto qendra janë shndërruar në vatra edukimi profesional dhe mundësi punësimi për të rinjtë tanë. Gjithashtu me dhjetra projekte janë në përpunim nga institucionet shtetërore dhe donatorët ndërkombëtarë, të cilat do të realizohen në të ardhmen e afërt.
Do të vazhdoj t’ju mbaj të informuar për çdo hap të zhvillimeve dhe përpjekjeve që po bëhen në vendlindjen tonë. Refuzoj të politizoj punën time dhe të stafit që drejtoj, dhe, po ashtu, nuk do të merrem me replika të pavlera ndaj atyre që shpifin dhe shantazhojnë. Ajo që na bashkon të gjithëve është një emër i vetëm: Tropoja dhe zhvillimi i saj.

Postimi

Sipas hetimeve të SPAK, në kundërshtim me ligjin, Byberi bashkë me nënkryetarin e kësaj Bashkie, kanë miratuar, “një projekt idenë e rrugës “Stacioni i Anijes Palç- Guri i Lules”, nga ku rezulton se është miratuar në parim Projekt ideja për ndërtimin e rrugës auto “Stacioni i Anijes Palç- Guri i Lules”, me një gjatësi 3.2km, totalisht ndërtim i ri i cili 80% të kësaj gjatësie kalon nëpër rrugën këmbësore ekzistuese.

Sipas vendimit, këto punime janë bërë në kundërshtim me aktet ligjore dhe nënligjore. Konkretisht për kryerjen e punimeve në bazë të VKM-së 408 datë 13.05.2015 (e ndryshuar) për hapjen e një rrugë të re subjekti i interesuar duhej të aplikonte në sistemin elektronik e-leje, pranë Bashkisë Tropojë, si institucion vendor që ka tagrin të shqyrtojë dhe miratojë lejen e ndërtimit të infrastrukturës, pasi të ketë verifikuar plotësimin e dokumentacionit të nevojshëm tekniko-ligjor nga aplikuesi që parashikon legjislacioni për këto lloj punimesh.

Gjithashtu, sipas njoftimi, Bashkia Tropojë duhej të bashkëvepronte me institucionet e tjera kompetente për ndërtimin e rrugës siç janë: Agjencia Kombëtare e Mjedisit, për nevojën e hartimit të Raportit të Vlerësimit të ndikimit në mjedis, të bashkëvepronte me Ministrinë e Linjës (parashikuar në sistemin elektronik e-leje) për impaktin e ndërtimit të rrugës së re dhe pasojat e këtyre punimeve të ndërtimit.