Nis prodhimi i fletëve të votimit për diasporën, Celibashi: Do të shpërndahen më 15 prill

Komisioni Qendror i Zgjedhjeve ka lajmëruar se ka nisur prodhimi i fletëve të votimit në Slloveni. Kreu i KQZ, Ilirjan Celibashi ka lajmëruar se po prodhohen 246 mijë fletë votimi dhe ato do të transportohen me kamionë në Shqipëri, ku pritet të mbërrijnë brenda 5 ditësh. Sapo ato të jenë në Tiranë, ato do të vendosen në Parkun Olimpik, ku KQZ do të bëjë mbushjen e pakove sipas shteteve dhe duke i vendosur çdo votuesi fletën e votimit të qarkut të tij. Shpërndarja e zarfeve do të bëhet përmes postës së shpejtë, nga kompania që ka një kontratë me KQZ.

“Ka filluar procesi i printimit të fletëve të votimit për votimin jashtë vendit dhe besojmë që midis datave 7-8 Prill do të kemi këtu fletët e votimit. Midis 8-9-10 fillojmë përgatitjen e zarfave dhe dokumentacionin që do t’u dërgohet votuesve, duke shpresuar që ky process të realizohet brenda datës 15-17 Prill. Kohë e mjaftueshme sipas parashikimeve kontraktuale që do të kemi me operatorin e shërbimit postar për të dërguar zarfat, për t’i dhënë kohë rreth 3-4 ditë për të plotësuar fletën e votimit dhe koha për t’u kthyer në KQZ deri në 19:00 të datës 11 Maj. Jemi duke përfunduar një tutorial për gjithë sa duhet të bëjë votuesi nga jashtë dhe me brenda 2-3 ditëve do të bëhet publike nëpërmjet mediave por edhe rrjeteve sociale. Po ndërtojmë një system të ndihmës dhe këshillimit për votuesit nga jashtë nëse kanë nevojë për sqarime për procedurat e votimit. Në setin e dokumentacionit, që do t’u dërgojmë do të jetrë edhe një udhëzues që sqaron qartësisht se çfarë duhet të bëjë votuesi nga jashtë”, tha Celibashi.

Ndërsa, për emigrantët që nuk gjenden në adresë, postieri do të lërë një shënim për ditën kur do të vijë sërish, ose vendin ku votuesi mund të shkojë ta tërheqë vetë zarfin.

“Sa i përket votimit brenda vendit, ajo që vlerësojmë më të rëndësishme për momentin është me fillimin e procesit të rekrutimit të operatorëve të përdorimit të pajisjes së votimit elektronik. Ky proces ka filluar prej disa ditësh, janë 6500 aplikime për operatorë por 5200 qendra votimit. Numri përfundimtar i qendrave të votimit do të dalë pasi drejtoria e përgjithshme e gjendes civile të përcjellë në KQZ ekstraktin e fundit të listës së votuesve brenda vendit. Kemi përgatitur një program të trajtimit të trajnimit të operatorëve. Ndërkohë jemi në procesin e përgatitjes teknike të këtyre pajisjeve. Kemi filluar edhe procesin e përgatitjes së votimit elektronik për njësinë nr 10 dhe bashkinë e Vorës. Besoj për 10 ditë, ose dy javë, do të vendosim në disa pika të njësisë 10 dhe bashkisë Tiranë, ku do të instalojmë këtë pajisje që votuesit të familjarizohen me përdorimin e këtyre pajisjeve”, u shpreh kreu i KQZ.

KQZ lajmëroi se së shpejti do të publikojë një video për të orientuar votuesit si të plotësojnë fletën e votimir dhe gjithashtu njofton zgjedhësit të mos shkruajnë asnjë shënim mbi zarfet, ku do të futet fleta. Emigrantëve shqiptarë iu sugjerohet që brenda 3 ditëve nga marrja e zarfit ta postojë në KQZ, pasi zarfet që vijnë pas orës 19:00 më datë 11 maj, nuk do të numërohen.