Palët bëjnë presion/ SHBA-të dhe Kina vijojnë bisedimet mbi tarifat tregtare në Suedi

Me afatin e rëndësishëm të 12 gushtit që po afron, zyrtarët tregtarë amerikanë dhe kinezë u rikthyen në tryezën e bisedimeve në Stokholm të martën, në përpjekje për të thyer bllokimin mbi tarifat midis dy ekonomive më të mëdha në botë.

Administrata e Presidentit të SHBA-së, Donald Trump, ka mbajtur një qëndrim të ashpër ndaj asaj që e konsideron një çekuilibër masiv tregtar me Kinën, duke e goditur gjigantin ekonomik aziatik me disa nga tarifat më të larta në çdo raund rritjeje të taksave të importit.

Progresi në Stokholm mund të hedhë themelet për një takim të nivelit të lartë midis Trump dhe Presidentit Kinez Xi Jinping më vonë këtë vit, i cili do të ishte vendimtar për arritjen e çdo marrëveshjeje të madhe.

Sekretari i Thesarit i SHBA-së, Scott Bessent dhe zëvendëskryeministri kinez He Lifeng nuk bënë komente publike për gazetarët pas ditës së parë të bisedimeve të hënën, pasi u takuan për gati pesë orë me dyer të mbyllura në zyrën e kryeministrit suedez.

Përpara se bisedimet të rifillonin të martën, kryeministri suedez Ulf Kristersson u takua me Bessent dhe përfaqësuesin tregtar të SHBA-së, Jamieson Greer, gjatë mëngjesit.

Shtetet e Bashkuara kanë arritur marrëveshje mbi tarifat me disa nga partnerët dhe aleatët e tyre kryesorë tregtarë – përfshirë Britaninë, Japoninë dhe Bashkimin Evropian – që kur Presidenti Donald Trump njoftoi tarifat e “Ditës së Çlirimit” kundër dhjetëra vendeve në prill. Kina mbetet ndoshta çështja më e madhe e pazgjidhur.

“Kinezët kanë qenë shumë pragmatikë”, tha Greer në komentet e postuara në mediat sociale nga zyra e tij të hënën vonë.

“Padyshim që kemi pasur shumë tensione gjatë viteve. Tani kemi tensione, por fakti që takohemi rregullisht me ta për të adresuar këto çështje na jep një bazë të mirë për këto negociata.”