Paralajmërohet revolucion/ Incidente në protestën para Kuvendit të Serbisë

Dera e Kuvendit të Serbisë është thyer dhe policia ka hedhur gaz lotsjellës ndaj protestuesve, të cilët protestuan për të shtatën herë me ftesën e opozitës, e cila po kërkon anulimin e zgjedhjeve në Serbi.

Më herët, përfaqësuesit e listës opozitare “Serbia kundër dhunës” tentuan të hynin në ndërtesën e Kuvendit, në mënyrë që t’iu adresoheshin qytetarëve nga ballkoni i Kuvendit.

Protestuesit shpërthyen derën, por nuk arritën të hynin, pasi u parandaluan nga policia, teksa një pjesë e protestuesve thyen xhamat dhe dritaret e ndërtesës.

Protesta e 24 dhjetorit nisi para selisë së Komisionit Republikan Zgjedhor, ku mijëra qytetarë u mblodhën me ftesë të koalicionit opozitar, “Serbia kundër dhunës”, që nuk njeh rezultatet e zgjedhjeve të 17 dhjetorit, pasi sipas opozitës, Partia Progresive Serbe (SNS) në pushtet ka fituar zgjedhjet përmes mashtrimeve zgjedhore.

Kërkesa për anulimin e zgjedhjeve në të gjitha nivelet po kërkohet për shkak të, siç është thënë, “pengimit të vullnetit të qytetarëve”.

Disa politikanë opozitarë gjatë kësaj jave u bashkuan në grevë urie, duke kërkuar përsëritjen e zgjedhjeve.

Udhëheqja shtetërore dhe SNS-ja kanë mohuar kritikat nga vëzhguesit vendorë dhe ndërkombëtarë. Komisioni Republikan Zgjedhor më 24 dhjetor njoftoi se ministritë e linjës kanë kontrolluar lisat zgjedhore dhe kanë ardhur në përfundim se pretendimet e listës “Serbia kundër dhunës” se numri i votuesve me të drejtë vote në zgjedhjet lokale në Beograd ishte rritur në mënyrë artificiale për të ndikuar në rezultat zgjedhor, “nuk ishin të vërteta”.

Ndërkaq, presidenti serb, Aleksandar Vuçiq, tha të dielën se vetëm institucionet shtetërore mund të vendosin nëse zgjedhjet duhet të përsëriten, duke deklaruar se zgjedhjet u mbajtën në atmosferë demokratike “dhe ishin zgjedhjet më paqësore në historinë moderne”.

Misioni vëzhgues i Organizatës për Siguri dhe Bashkëpunim në Evropë tha më 18 dhjetor se zgjedhjet u përshkruan me parregullsi serioze, keqpërdorim të fondeve shtetërore, me fushatë negative dhe përhapje të frikës.

Ndërkaq, eurodeputetët kanë kërkuar hetim të pavarur për të gjitha parregullsitë në zgjedhjet parlamentare, lokale dhe krahinore të mbajtura më 17 dhjetor.

Shtetet e Bashkuara po ashtu u kanë bërë thirrje autoriteteve në Serbi që të hetojnë pretendimet për parregullsi të bëra nga vëzhguesit ndërkombëtarë.