Përdhunoi 19-vjeçaren shqiptare, vetëdorëzohet reperi grek

Reperi i njohur grek me emrin ‘Rack’ është vetëdorëzuar në polici bashkë me të dashurën e tij pasi janë akuzuar për përdhunimin e një 19-vjeçareje shqiptare në Rethymno, Kretë.

Lajmi për mediat greke është bërë i ditur nga avokati i reperit 24-vjeçar. Në lidhje me këtë ngjarje është arrestuar më herët edhe një 30-vjeçar shqiptar i cili është mik dhe bashkëpunëtor me reperin grek.

19-vjeçarja shqiptare ka denoncuar të hënën në polici ngjarjen që i ka ndodhur. Sipas saj mbrëmjen e së dielës së kaluar, ajo ka qenë në një lokal në qytetin e vjetër të Rethymnos, ku ka takuar tre persona, reperin 24-vjeçar që po performonte, të dashurën e tij 23-vjeçare dhe 30-vjeçarin shqiptar.

Pas përfundimit të koncertit ata shkuan për darkë dhe në orët e para të mëngjesit, e dashura e reperit ka ftuar shqiptaren në hotelin ku ata qëndronin. Aty ishte edhe reperi dhe shoku i tij shqiptar. Ata kanë pirë alkool, kanë pirë duhan dhe më pas sipas vajzës shqiptare të dy kanë filluar të zhvishen, të kryejnë akte seksuale ndaj saj e madje dyshohet se janë tallur me të, sepse ajo nuk ka mundur të reagojë dhe të përgjigjet për shkak të alkoolit dhe hashashit.

Në mëngjes ajo është larguar nga hoteli dhe ka denoncuar rastin në polici.