“Reforma në drejtësi s’ka dhënë pritshmëritë e duhura”, avokati: Priten ndryshime kushtetuese dhe një auditim i thellë

Avokati i njohur Edmond Petraj u shpreh se sistemi i drejtësisë së re ka problematikat e veta.

Ai theksoi se prej pesë vitesh njerëz të fushës, avokatë dhe juristë kanë folur për këto probleme, ndërsa pohoi se politika është kujtuar shumë vonë për të folur për këtë çështje dhe  se reforma në drejtësi nuk ka dhënë impaktin e kërkuar.

Sipas tij, në këto kushte nuk përjashtohet fakti, që partitë politike mund të ndërmarrin një iniciativë për të ndërhyrë në Kushtetutë.

“Kemi 5 vjet që i flasim problematikat, ata sot u kujtuan. Reforma në drejtësi nuk ka dhënë pritshmëritë e duhura pasi ka plot probleme. Situata nuk është favorizuese. Kam përshtypjen se do ketë një update shumë të shpejtë. Një iniciativë për të ndërhyrë në Kushtetutë dhe për të bërë përditësime në sistemin e drejtësisë”, theksoi ai.

Ai theksoi se partitë politike aktualisht nuk  e kontrollojnë dot SPAK, por shtoi se reforma në drejtësi mund t’i nënshtrohet një auditimi të thellë për të korrigjuar gabimet e mundshme.

“SPAK po bën punën e vet, asnjë parti politike nuk e kontrollon dot. Do kemi një audit të jashtëzakonshëm dhe një analizë të rezultateve të reformës në drejtësi”, tha ai.