RENEA aksion në Vlorë, mes 10 të arrestuarve dhe vëllai i fortit të Selenicës

Forcat e Ndërhyrjes së Shpejtë dhe Policia e Vlorës kanë vijuar mbrëmjen e sotme aksionin në kuadër të operacionit “Tempulli”.

Mësohet se tanimë në pranga kanë përfunduar 10 persona, një prej të cilëve është Santiljano Basho. Ai është identifikuar nga policia e Vlorës, por është pikasur nga efektivët civilë. Po ashtu raportohet se është gjetur një çantë me sasi parash dhe dy pistoleta.

Ata kanë qëndruar pranë tij si civil teksa kanë ndërhyrë për ta neutralizuar. Burimet e policisë konfirmojnë se i ka kundërshtuar fizikisht.

Basho është vëllai i një prej personave problematikë të njohur të Selenicës, Tesi Basho, i akuzuar për një sërë krimesh në Itali dhe Shqipëri. Tesi Basho është dënuar me burg përjetë edhe në Itali për drogë, armë dhe falsifikime.

Sakaq, mësohet se operacioni policor vijon dhe se FNSH po kryen kontrolle në Vlorë, Selenicë por edhe në disa fshatra përgjatë Lumit të Vlorës.