Rrëshkitjet e dheut në Kolumbi, 27 viktima

Një rrëshqitje dheu në një rrugë në provincën Risaralda në Kolumbinë perëndimore ka vrarë të paktën 27 persona, ka njoftuar presidenti i vendit.

Sipas BBC, një autobus plot me pasagjerë ishte në mesin e disa automjeteve të groposura nën baltë dhe gurë, të cilët u rrëzuan nga një kodër pas shirave të dendur. Një nga pasagjerët ndihmoi gruan dhe dy fëmijët e tij të iknin nga autobusi para se të varrosej dhe të vdiste.

“Të paktën tre fëmijë janë në mesin e të vrarëve,” tha Presidenti Gustavo Petro.

Rrëshqitja e dheut ndodhi në orët e para të mëngjesit të së dielës me orën lokale në rrugën që të çon në provincën veriore të Choco.

Dëshmitarët thanë se një autobus ndërqytetës, një xhip dhe një motoçikletë ishin ndalur në rrugë për shkak të një aksidenti automobilistik më tej, kur një pjesë e kodrës u shemb në majë të tyre.

Autobusi mendohet se kishte dy shoferë dhe 25 pasagjerë në bord kur u nis, por më shumë pasagjerë mund të kishin hipur gjatë rrugës. Një nga ata që vdiqën brenda autobusit u identifikua si Guillermo Ibargüen. Djali i tij Andrés i tha Caracol News se “Babi më ndihmoi të dilja nga autobusi përmes një vrime të vogël”.

“Më duhej të hidhesha poshtë përroskës. Kur u hodha, balta kishte mbuluar gjithçka,” tha ai.

Të paktën nëntë persona i kanë mbijetuar rrëshqitjes së dheut, duke përfshirë një vajzë që shpëtuesit e panë të ngjitur pas trupit të nënës së saj të vdekur. Rrëshqitjet e dheut nuk janë të rralla në Kolumbi, veçanërisht në sezonin e shirave, dhe rrugët malore shpesh priten nga balta dhe gurët.