Rrjeti spiunazh izraelit goditet në Teheran/ 20 arrestime, Irani nuk tregon mëshirë

Irani ka arrestuar 20 persona që pretendohet se janë operativë të agjencisë së spiunazhit Mossad të Izraelit në muajt e fundit, tha gjyqësori të shtunën, duke paralajmëruar se ata nuk do të përballen me asnjë butësi dhe do të bëhen shembull.

Të mërkurën, Irani ekzekutoi një shkencëtar bërthamor të quajtur Rouzbeh Vadi, i cili u dënua për spiunazh për Izraelin dhe transmetimin e informacionit mbi një shkencëtar tjetër bërthamor të vrarë në sulmet ajrore të Izraelit ndaj Iranit në qershor, raportuan mediat shtetërore.

Zëdhënësi i gjyqësorit Asghar Jahangiri u tha gazetarëve në Teheran të shtunën se akuzat kundër disa prej 20 të dyshuarve të arrestuar ishin rrëzuar dhe ata u liruan. Ai nuk dha një numër.

“Gjyqësori nuk do të tregojë asnjë butësi ndaj spiunëve dhe agjentëve të regjimit sionist dhe me vendime të prera, do t’i bëjë të gjithë shembull”, u citua Jahangiri nga mediat iraniane.

Ai tha se detajet e plota do të bëhen publike pasi të përfundojnë hetimet.

Ekzekutimet e iranianëve të dënuar për spiunazh për Izraelin janë rritur ndjeshëm këtë vit, me të paktën tetë dënime me vdekje të kryera në muajt e fundit.

Izraeli kreu 12 ditë sulme ajrore ndaj Iranit në qershor, duke synuar gjeneralët më të lartë të Iranit, shkencëtarët bërthamorë, instalimet bërthamore, si dhe lagjet e banimit. Irani u përgjigj me breshëri raketash dhe dronësh mbi Izraelin.

Grupi i të drejtave të njeriut HRANA raportoi 1 mijë e 190 vdekje iraniane gjatë sulmeve 12-ditore izraelite, përfshirë 436 civilë dhe 435 personel sigurie.