Sanksionet/ Moska djeg gazin në ajër

Ndërsa konsumatorët evropianë janë dëshmitarë të rritjes së çmimeve të energjisë, në kufijtë lindorë të Bashkimit Evropian, Rusia po djeg miliona metra kub gaz në ditë. Një pishtar i ndezur është i dukshëm mbi fabrikën e karburantit të lëngshëm Portovaya në rajonin e Leningradit.

Sipas ekspertëve, në këtë mënyrë Gazprom “po shpëton” nga gazi i tepërt pas ndërprerjes së furnizimeve në Gjermani prej pushtimit rus të Ukrainës dhe sanksioneve kundër Moskës. Gjermania e sheh ketë si një lëvizje politike kurse Gazprom thotë se këto janë vetëm çështje teknike.

Edhe pse, gazi në Portovaya mund të digjet edhe për shkak të një mosfunksionimi, ka nga ata që vënë në dukje periudhën e pazakontë të djegies dhe vëllimet shumë të larta të karburantit të humbur.
Situata gjithashtu mund të shkaktojë shqetësim serioz tek ambientalistët. Rusia ka vëllimet më të larta të gazrave të djegur dhe produkteve të djegies që përshpejtojnë ngrohjen globale.

Që në prill, Unioni Rus i Industrialistëve kishte paralajmëruar se me fillimin e luftës dhe pas sanksioneve të reja, kompanitë do të detyrohen të rrisin ndjeshëm prodhimin. Megjithatë, kompanitë nuk kanë asnjë sistem ruajtjeje për të ruajtur produktin e tepërt të disponueshëm.