Separatistët katalanas kërcënojnë t’i japin fund mbështetjes për kryeministrin e Spanjës

Partia separatiste katalane në parlamentin spanjoll, Junts, prezantoi një masë në dhomën e ulët të Spanjës të hënën duke i kërkuar kryeministrit Pedro Sanchez t’i nënshtrohet një mocioni besimi, duke e tensionuar më tej qeverinë e brishtë të pakicës që mbështetet në mbështetjen e Junts për të miratuar ligje.

Junts është dëshmuar si një partner i lëvizshëm për ekzekutivin e udhëhequr nga socialistët, duke argumentuar se Madridi po nuk po investon sa duhet në rajonin verilindor dhe po refuzon disa nga koncesionet që kishte premtuar.

“Sanchez llogariti votat tona për t’u bërë kryeministër – le të tregojë fytyrën e tij,” tha në një konferencë shtypi lideri i Junts Carles Puigdemont, i cili jeton në mërgim të vetë-imponuar në Belgjikë.

Sipas Kushtetutës, vetëm kryeministri mund të vendosë nëse do të kërkojë besimin e dhomës së ulët me një shumicë të thjeshtë. Procedura është e ndryshme nga një mocion mosbesimi, i cili në Spanjë kërkon që partia që e paraqet atë të paraqesë një kandidat alternativ për kryeministër dhe të sigurojë një shumicë absolute.

Në bisedë me korrespondentët e huaj në Madrid, Sanchez tha se ai nuk kishte “as qëllim dhe as nevojë” për t’iu nënshtruar një votimi besimi, i cili është mbajtur vetëm dy herë që nga kthimi i vendit në demokraci në 1978.

Megjithatë, nisma e Junts do të debatohet në fillim të vitit 2025, me Partinë Popullore konservatore dhe Vox të ekstremit të djathtë që pritet ta mbështesin atë, duke siguruar kalimin e saj.

Megjithatë, Sanchez – i cili nuk duhet të thërrasë zgjedhjet deri në vitin 2027 – mund të zgjedhë të injorojë kërkesën jodetyruese të parlamentit.

Puigdemont paralajmëroi se nëse Sanchez do ta bënte këtë, besimi i partisë së tij në qeveri do të prishej, duke nënkuptuar që Junts do të tërhiqte të gjithë mbështetjen.