Shijak/ Mbanin në banesë municion luftarak, arrestohet 30-vjeçari, shpallet në kërkim babai i tij

Policia ka arrestuar një 30-vjeçar në Shijak, ndërsa babai i tij është shpallur në kërkim pasi mbanin në banesën e tyre municion luftarak.
Policia ka finalizuar operacionin policor të koduar “Double”, ku u arrestua në flagrancë Saimir Sefaj, 30- vjeç dhe u shpall në kërkim babai i tij, Shefqet Sefaj, 54- vjeç.
Atyre u janë sekuestruar, 1 kallashnikov dhe 1 pistoletë, 4 karikatorë dhe 157 fishekë luftarak.
Si rezultat i kontrolleve të kryera me mbështetjen e inteligjencës policore, me objektiv ndalimin e shtetasve që posedojnë armë zjarri pa leje dhe janë rrezik potencial për sigurinë publike, shërbimet e Komisariatit të Policisë Shijak finalizuan operacionin “Double”. Gjatë operacionit u arrestua në flagrancë shtetasi Saimir Sefaj, 30 vjeç dhe u shpall në kërkim babai i tij, shtetasi Shefqet Sefaj, 54 vjeç.
Nga kontrollet në banesën e tyre në Maminas, u gjetën 2 armë zjarri (kallashnikov dhe pistoletë), 4 karikatorë dhe 157 fishekë luftarak. Punohet për kapjen e 54-vjeçarit’, njoftoi sot policia.
Materialet procedurale iu referuan Prokurorisë së Durrësit, për veprime të mëtejshme.