Sulmet izraelite vranë të paktën 58 persona në Gaza gjatë natës

Sulmet izraelite kanë vrarë të paktën 58 palestinezë në të gjithë Rripin e Gazës gjatë natës, sipas tre spitaleve lokale, shkruan The Guardian.

Sipas Associated Press, sulmet goditën disa shtëpi në mes të natës, duke vrarë burra, gra dhe fëmijë ndërsa flinin.

Izraeli rifilloi sulmet e ashpra në të gjithë Gazën të martën, duke shkatërruar një armëpushim që e kishte ndalur luftën dhe kishte mundësuar lirimin e disa pengjeve. Izraeli e fajësoi Hamasin për rinisjen e luftimeve, duke thënë se grupi militant kishte refuzuar një propozim të ri që devijonte nga marrëveshja e nënshkruar më herët.

Më shumë se 400 palestinezë u vranë vetëm të martën, shumica gra dhe fëmijë, sipas Ministrisë së Shëndetësisë në Gaza.

Izraeli, që gjithashtu ka ndërprerë furnizimin me ushqim, karburant dhe ndihma humanitare për rreth 2 milionë palestinezët e Gazës, ka premtuar se do t’i intensifikojë operacionet e tij derisa Hamasi t’i lirojë 59 pengjet që i mban – 35 prej të cilëve besohet se kanë vdekur – dhe të heqë dorë nga kontrolli i territorit.

Administrata Trump, e cila mori meritën për ndërmjetësimin e armëpushimit, thotë se e mbështet plotësisht Izraelin.