Takimi me sekretarin britanik dhe të dërguarën e Posaçme/ Kurti rithekson rëndësinë e anëtarësimit të Kosovës në NATO

Kryeministri në detyrë Albin Kurti, thekson rëndësinë e anëtarësimit të Kosovës në NATO dhe organizata të tjera ndërkombëtare, në takimin e përbashkët me Sekretarin e Shtetit për Punë të Jashtme të Mbretërisë së Bashkuar, David Lammy, dhe të dërguarën e Posaçme për Ballkanin Perëndimor, Karen Pierce.

Kurti në postimin e tij në Facebook ka thënë se u ka shprehur mirënjohjen për kontributin dhe mbështetjen ndaj vendit përgjatë të gjitha etapave të shtetndërtimit.

“Biseduam mes tjerash për progresin demokratik dhe zhvillimin ekonomik që ka njohur vendi ynë gjatë këtij mandati qeverisës dhe objektivat e synimet parësore të Republikës së Kosovës për anëtarësim në NATO, Bashkim Evropian dhe në Këshillin e Evropës. Gjithashtu, i urova edhe për pritjen e Samitit të Procesit të Berlinit këtë vit nga ana e Mbretërisë së Bashkuar e për të cilën ofrova bashkëpunimin tonë për ta bërë këtë samit sa më të suksesshëm,” ka shkruar ai.