“Ti je me llumin” – Jorida Tabaku mallkohet se nuk e do Sali Berishën, por PD ka nevojë të dëshpëruar për të

Nga Ermal Mulosmani

PD ka nevojë për Jorida Tabakun.

Këto ditë kam parë, jo fort me vëmendje, një video të shpërndarë nga përkrahës të Partisë Demokratike që ka në fokus Jorida Tabakun. Ajo, në një komunikim me një qytetare, tregohet indiferente e gati mirëkuptuese ndaj etiketimit “llumi” që qytetarja përdor për grupimin politik për të cilin Jorida konkurron. Madje, shkon pak më tej, konfirmon që ajo është tjetër gjë, nuk përzihet me ta. Pak a shumë kështu është.

Militantë të PD-së, kryesisht qëndrestarë nga më të flaktët  pro Berishës, e kanë shpërndarë videon bashkë me mallkimet ndaj Joridës.  Ndjej shumë keqardhje për Joridën edhe pse nuk e njoh fare dhe kurrë nuk e kam takuar.

Ajo u pozicionua kundër Berishës në ditët e para, atëherë kur ishte nënkryetare e PD-së dhe një nga zërat kryesorë të saj. Si shumë  e shumë të tjerë. Si Gazi, Gjeka, Ina Zhupa, Çollaku e të tjerë. Jo aq flakë sa Gjeka e Gazi që përbetoheshin kundër Berishës por pak më e përmbajtur.

Diku nga fundi, kur e pa që anija e Lulit po mbytej, u kthye nga Berisha. Nuk mbeti më Parti. Por gjithmonë me një vetëpërmbajtje dhe pa një entuziasëm të madh. Hodhi edhe vallen e Berishës në partyn e vitit të ri “O moj Serbi o murin ta prisha…”.

Konkurroi edhe në primare ku doli ndër më të votuarat.

Berisha e futi në listë të hapur. Ai ndërtoi bunkerin besnik në listë të mbyllur dhe listën e bletëve punëtore që do punonin për ta.

Jorda ishte në listën e bletëve, ka për detyrë të grumbullojë vota për Mulin, Erisën, Tedin, Mesilën e këta.

Filloi Jorida e shkretë fushatën, pa pikën e dëshirës sigurisht. Të mbledhë vota personale e t’i çojë në thesin e PD-së.

Por…. “armiku” u zbulua! Nën petkun e kandidatit për deputet!

Qëndrestarët deri në vdekje nuk i duan votat e saj sepse ajo pajtohet me etiketën “llum” të një qytetareje, madje, shkon më tej. Thotë unë jam vetvetja, pra nuk jam llumi.

Mua më pëlqejnë njerëzit jo entuziastë në përgjithësi. Ata që ruajnë një vetëpërmbajtje dhe një farë dinjiteti personal. Jorida hyn te ata njerëz që i bëjnë punë Partisë Demokratike, e trukojnë, e rinojnë, edukojnë, zbukurojnë. Nuk është injorante, nuk bërtet kot, nuk imiton liderin, përdor herë pas here trurin. Ajo, Alimehmeti e të tjerë (nuk janë aq shumë) të japin një ndjesi të mirë.

Ajo mallkohet sepse nuk e do Sali Berishën. As Sali Berisha nuk e do Joridën thellë-thellë. Unë besoj se të njëjtin raport reciprok Bersha ka edhe me Gazin, Gjekmarkajn e të tjerë.

Por këta të tjerët i çoi në bunker, në lista të mbyllura. Ndërsa më të mirën prej tyre, më të vetpërmbajturën, më dinjitozen e la jashtë. Si ndëshkim për hezitimin e gjatë dhe për faktin që nuk u vetëposhtërua si Gjeka për shembull.

PD pa njerëz si Jorida (për mua edhe Gazi, Alimehmeti, Ina Zhupa, Myslym Murrizi) është një repart ushtarak i zymtë dhe pa pikën e atraksionit politik. Thellë brenda vetes e kam një tërheqje për këtë formacion politik për faktin se e kam votuar sistematikisht por edhe sepse është lokomotiva opozitare.

Ky ishte shkaku pse i shkrova këto rreshta. Vlerësojini njerëzit për atë që janë, për vlerat që kanë, për cilësitë individuale. Qoftë edhe për diversitetin e tyre. Jo për besnikërinë dhe bindjen pa kushte. Me të tillë nuk merret kurrë pushteti.